वालिङ,२२ वैशाख– वालिङमा कोरोनाको दोस्रो भेरियन्टको संक्रमण फैलँदो क्रममा रहेको छ । बुधबार गह्रौ प्राथामिक अस्पताल वालिङमा गरिएको एन्टिजिन परीक्षणमा ३५ जनामा संक्रमित पुष्टी भएको हो । बुधबार पुष्टी हुनेहरुमा वालिङ नगरपालिका १ का १९ जनामा संक्रमण पुष्टी भएको हो । संक्रमित हुनेहरुमा ५ पुरुष र १४ महिला छन् । त्यस्तै वडा नं. २, ६, ७, र ८ का १÷१ जना, वडा नं. ९ का ३ जना, ११ का १ जना, वडा नं. १३ का ५ जना र १४ का २ जना छन् । वडा नंं १ को धरमपानी फूलबारी गाउंका मात्रै १९ जनालाई पुष्टी भएको हो ।

वडा नम्बर १ का वडा अध्यक्ष एवं नगर प्रवक्ता केदार काफ्लेका अनुसार एउटै गाउँमा १९ जनालाई संक्रमण पुष्टी भएपछि गाउँलाई नै शिल गरिएको छ । उक्त गाउँबाट अन्यत्र जान र आउन समेत नपाईने भएको हो । संक्रमण पुष्टी हुनेहरुलाई होम आइसोलेसनमा राखिएको छ । बुधबार नगरप्रमुख, उपप्रमुख सहित जनप्रतिनिधि र स्वास्थ्यकर्मी गाउँमै पुगेर कोरोनालाई परास्त गर्न आवश्यक स्वास्थ्य मापदण्ड पालना गर्न आग्रह गरिएको वडा अध्यक्ष काफ्लेले बताउनुभयो । होम आइसोलेसनमा रहेका संक्रमितहरु स्वास्थ्यकर्मी र जनप्रतिनिधिको सम्पर्कमा रहनेछन् । स्वास्थ्यकर्मीले आवश्यक परामर्श दिनेछन् ।