वालिङ,२९ साउन– स्याङ्जामा खोलाले मोटरसाइकलसहित बगाउँदा एक युवकको मृत्यु भएको छ।

पुतलीबजार नगरपालिका–३ बाडखोलाका २१ वर्षीय सलिम मगरलाई पुतलीबजार नगरपालिका–१ स्थित अरौदीखोलाले मोटरसाइकलसहित बिहीबार बगाएको थियो। 

बिहीबार ग.११ प. ८१८३ नम्बरको मोटरसाइकलसहित खोलाले बगाएर बेपत्ता भएका मगरलाई खोजी गर्ने क्रममा सिंहसार्दुल गुल्म स्याङ्जा, जिल्ला प्रहरी कार्यालय स्याङ्जा र सशस्त्र प्रहरी बल नेपाल ३० नं. गुल्म वालिङबाट खटिएको टोलीले आज दिउँसो पुतलीबजार नगरपालिका–१३ गैरीजागर स्थित आँधीखोलामा मृत अवस्थामा फेला पारेको जिल्ला प्रहरी कार्यालय स्याङ्जाका प्रहरी नायव उपरीक्षक रमेश दत्त अवस्थीले जानकारी दिनुभयाे।

सुरक्षाकर्मीको टोलीले शव खोलाबाट बाहिर निकालेर आवश्यक मुचुल्का गरी पोस्टमार्टमका लागि जिल्ला अस्पताल स्याङ्जा पठाइएको र घटनाबारे थप अनुसन्धान भइरहेको जिल्ला प्रहरी कार्यालय स्याङ्जाले जनाएको छ।