स्याङ्जा,२२ वैशाख– गल्याङ नगरपालिकामा कोरोना संक्रमणको दर तिब्र गतिमा बढेको छ । नगरपालिकाले सञ्चालन गरेको गल्याङ नगर अस्पतालमा बुधबार गरिएको दश जनाको एन्टिजिन परिक्षणका क्रममा आठ जनामा संक्रमण पोजेटिभ देखिएको छ ।

संक्रमित हुनेहरुमा सबै जना गल्याङ नगरपालिका ३ का चार पुरुष र चार महिला रहेका छन् । संक्रमित हुनेहरुमा क्रमश ३३, ५३, र ४५ वर्षिय पुरुष र ५३, ४५ र ४५ वर्षिया महिला रहेका छन् । यसै गरी १५ वर्षका बालक र १० वर्षकी बालिकामा पनि संक्रमण देखिएको नगरपालिका स्वास्थ्य शाखाले जनाएको छ । यो संगै गल्याङ नगरपालिकामा कोरोना संक्रमित नयाँ भेरियन्ट को संख्या २३ पुगेको छ ।

स्वास्थ्यमा समस्या देखिएका संक्रमितहरु मध्ये काठमाडौंमा एक जना, पोखरामा तीन जना पाल्ल्पामा एक र बुटवलमा दुई जना संक्रमितको उपचार भैरहेको छ । भने संक्रमित भएपनि लक्षण नदेखिएकाहरु होम आइसोलेसनमा रहेको नगरपालिकाले जनाएको छ । उपचारका क्रममा वडा नम्बर ११ का ५० वर्षिय एक पुरुषको पोखरामा निधन भएपछि कोरोना बाट गल्याङ नगरपालिकामा मृत्यु हुनेको संख्या दुई पुगेको छ ।

सचेत हुन नगरवासीलाई नगरप्रमुख अधिकारीको अपिल

संक्रमितको संख्या तिब्र गतिमा बढिरहेको भन्दै सचेत हुन नगरवासीलाई नगरप्रमुख अधिकारीको अपिल गर्नुभएको छ ।
कोरोना संक्रमणको दर तिब्र गतिमा बढिरहेको भन्दै नगरप्रमुख अधिकारीले यो महामारीबाट जोगिन आफै सचेत हुनु बाहेक अर्को उपाय नभएको बताउनुभयो ।
पत्रकारहरुसँगको कुराकानीमा उहाँले आफै सचेत भएर प्रशासनले तय गरेका मापदण्डहरुको पालना गर्ने र उच्च साबधानी अपनाउनुपर्नेमा जोड दिनुभयो ।

नगरप्रमुख अधिकारीले भन्नुभयो; ‘नगरपालिका सबै जनताको सुरक्षाको लागि सचेत ढंगले काम गरिरहेको छ, संक्रिमत हुन नदिने र भईहाले पनि नआत्तिएर अगाडि बढ्न म नगरवासीलाई आग्रह गर्दछु ।’
नगरपालिकाले अक्सिजन सहितको आइसोलेसन निर्माण गरिरहेको भन्दै उहाँले संक्रमितको उपचार गर्न नगरपालिका प्रतिबद्ध रहेको बताउनुभयो ।