राधिका पाैडेल

स्याङ्जा,३० साउन- जिल्ला प्रहरी कार्यालय स्याङ्जाले साउन महिनामा जिल्लामा भएका अपराध नियन्त्रण, शान्तिसुरक्षा तथा प्रहरी सेवासम्बन्धी गतिविधि सार्वजनिक गरेको छ। 

जिल्ला प्रहरी कार्यालयले शनिबार पत्रकार भेटघाट तथा अन्तरक्रिया कार्यक्रम आयोजना गरी साउन महिनाभरका गतिविधि र उपलब्धिबारे जानकारी दिएको हो।

कार्यक्रममा साउन महिनामा अपराध अनुसन्धान, शान्तिसुरक्षा, सवारी दुर्घटना, विपद् व्यवस्थापन, लागूऔषध नियन्त्रण तथा नागरिक सेवा प्रवाहका क्षेत्रमा भएका कामबारे जानकारी गराइएकाे थियाे। अपराध तथा घटना न्यूनीकरणका लागि समुदाय, सञ्चारमाध्यम र सरोकारवाला निकायसँगको सहकार्यलाई प्राथमिकता दिएको प्रहरीले जनाएको छ।

जिल्ला प्रहरी कार्यालय स्याङ्जाका प्रहरी नायव उपरीक्षक रमेश दत्त अवस्थीले साउन महिनाको प्रगति विवरण प्रस्तुत गर्दै अपराध नियन्त्रण तथा अनुसन्धानका गतिविधिबारे जानकारी दिनुभएकाे हाे। प्रहरीका अनुसार साउनमा विभिन्न शीर्षकमा २१ वटा मुद्दा दर्ता भएका छन् भने पाँचवटा फर्छ्योट भएका छन्।

कार्यक्रममा जिल्ला प्रहरी कार्यालयका प्रमुख प्रहरी उपरीक्षक रञ्जित सिंह राठौरले प्रहरी र सञ्चारमाध्यमबीचको समन्वयलाई थप प्रभावकारी बनाउने बताउनुभयाे। अपराध तथा घटना न्यूनीकरणका लागि प्रहरी र पत्रकारबीचको सहकार्य अझ बलियो बनाउँदै लैजानुपर्ने प्रमुख राठाैरकाे भनाइ थियाे।

प्रहरीले साउन महिनामा १ सय १६ वटा सचेतनामूलक कार्यक्रम सञ्चालन गरेको जनाएको छ। ती कार्यक्रममा २ हजार ५ सय ९१ जना सहभागी भएकाे र समुदाय प्रहरी साझेदारीअन्तर्गत पनि विभिन्न कार्यक्रम सञ्चालन गरिएको प्रहरीले जनाएको छ।