बल खोस्ने प्रयास गर्दै वालिङ र संकटाका खेलाडी । तस्बिर : एन्फा

काठमाडौँ,२४ भदौ- वालिङ नगरपालिकाले एन्फा महिला लिगमा दोस्रो जित निकालेको छ । सातदोवाटोस्थित एन्फा मैदानमा सोमबार भएको खेलमा वालिङले सङ्कटा क्लबलाई १–० गोलले हरायो । 

वालिङको कठिन जितमा सिसी एनटोङ्गोले३९औँ मिनेटमा निर्णायक गोल गर्नुभयो । दोस्रो जितसँगै वालिङले ६ अङ्क बनाएको छ । तीन खेलमा दोस्रो हार खेपेको सङ्कटाको एक अङ्क छ । 

अखिल नेपाल फुटबल सङ्घ (एन्फा) ले आयोजना गरेको लिगमा विभागीय तीनसहित १० टोलीको सहभागिता रहेको छ । दुई करोड २४ लाख ६८ हजार रुपियाँ लगानी रहेको लिगको विजेताले १० लाख र उपविजेताले पाँच लाख रुपियाँ पुरस्कार पाउने एन्फाले जनाएको छ । 

यस्तै लिगको उत्कृष्ट खेलाडीलाई एक लाख, फेयर प्ले टोलीलाई एक लाख ५० हजार, विधागत उत्कृष्ट खेलाडीलाई जनही ५० हजार रुपियाँ प्रदान गरिनेछ ।