मणी प्रसाद अर्याल

वालिङ,२० असार- वालिङ नगरपालिका दलित समुदायको परम्परागत सिपको संरक्षणमा लागेको छ । पछिल्लो समय आधुनिकता र नयाँ पुस्ताको परम्परागत सिपमा रुचि कम हुँदै गएका कारण दलित समुदायको परम्परागत सिप विस्तारै हराउँदै जान थालेका बेला नगरपालिका भने परम्परागत सिप संरक्षणमा जुटेको हो । वालिङ नगरपालिकाले दलित समुदायको लागि पञ्चे बाजाका सेट, सिलाई मेसिनहरु प्रदान गरेको हो ।
विभिन्न धार्मिक कार्यमा विशेष गरी विवाह प्रतबन्धमा प्रयोग हुँदै आएको पञ्चेबाजा पछिल्लो समय आधुनिकताका कारण र नयाँ पुस्तामा पुख्र्यौली पेशामा रुचि कम हुँदै जान थालेपछि पञ्चेबाजा लोप हुँदै जान थालेको छ । नगरपालिकाले भने दलित समुदायलाई आयआर्जन संग जोड्न तथा परम्परागत पुख्यौली पेशालाई निरन्तरता दिन चाहानेहरुका लागि अनुदानमा पञ्चेबाजा र सिलाई मेसिनहरु प्रदान गरेको उपप्रमुख कविता तिवारीले बताउनुभयो ।

उपप्रमुख तिवारीले भन्नुभयो, ‘हामी दलित समुदायको जिवनस्तरलाई माथि उठाउनका लागि विभिन्न कार्यक्रम गरेकाछौँ । दलित समुदायले गर्दै आउनुभएको परम्परागत पेशा व्यवसायलाई आधुनिकिकरण गरी अगाडि बढाउनका लागि आधुनिक खालका सिलाई मेसिनहरु उपलब्ध गराएकाछौँ ।’ नगरमा पछाडिपरेका समुदायलाई आर्थिक रुपमा सबल तथा सक्षम बनाउन आवश्यक सहयोग गर्दै आएको नगरपालिकाले जनाएको छ ।
कार्यक्रममा प्रमुख प्रशासकिय अधिकृत तेजराज शर्माले नगरभित्रका पञ्चे बाजा बजाउने समुह, शिलाई व्यवसाय गर्दै आउनुभएका उद्यमीहरुका लागि मागको आधारमा आधुनिक शिलाई मेसिनहरु उपलब्ध गराईएको बताउनुभयो । नगरभित्रका ६७ जनाले उक्त उपकरणहरु लगेका छन् । एक समुहलाई पञ्चेबाजा सेट, ६ जनालाई जुत्ता शिलाउने आधुनिक मेसिन २८ जनालाई कपडा सिलाउने मेसिन र अन्यले आरन पंखा, वल्डीङ मेसीन र जस्तापाता प्राप्त गरेका छन् ।