स्याङ्जा,७ असोज- स्याङ्जाको चापाकोट नगरपालिका–७ रामघाटबाट प्रहरीले अवैध रूपमा बालुवा ओसारपसार गरिरहेका दुई वटा ट्याक्टर नियन्त्रणमा लिएको छ।

मंगलबार प्रहरी चौकी साखरबाट खटिएको प्रहरीकाे गस्ती टोलीले रामघाटबाट लु.३ त. ५२५३ र लु.३ त. ९२४१ नम्बरकाे ट्याक्टरले अवैध रूपमा बालुवा ओसारपसार गरिरहेको अवस्थामा फेला पारी नियन्त्रणमा लिएको जिल्ला प्रहरी कार्यालय स्याङ्जाका प्रहरी नायव उपरीक्षक रमेशदत्त अवस्थीले जानकारी दिनुभयाे।

नियन्त्रणमा लिइएका दुवै ट्याक्टरलाई आवश्यक कारबाहीका लागि चापाकोट नगरपालिकाको कार्यालयमा पठाइएकोमा बुधबार नगरपालिकाले प्रत्येक ट्याक्टरलाई १० हजार रुपैँयाका दरले जरिवाना गरी छाडेको जिल्ला प्रहरी कार्यालय स्याङ्जाले जनाएको छ।