वालिङ,३२ जेठ- स्याङ्जा थिंक ट्यांकले आयोजना गरेको तीन दिने ‘स्याङ्जा शिक्षा, सीप तथा उद्यमशीलता मेला’ आज देखि वालिङमा सुरुभएको छ ।
मेलाको उद्घाटन गर्दै वालिङ नगरपालिका वडा नम्बर ८ का वडा अध्यक्ष दामोदर तिवारीले तीन दिन सम्म सञ्चालन हुने कार्यक्रमले युवाहरुमा एक प्रकारको उत्साहा ल्याउने बताउदै कार्यक्रमको सफलताको शुभकामना व्याक्त गर्नुभयो । अध्यक्ष तिवारीले वडा कार्यालयको तर्फबाट संस्थाले गर्ने रचनात्मक कामा सक्दो सहयोग गर्ने समेत बताउनुभयो ।
वालिङ उद्योग वाणिज्य संघका अध्यक्ष चेत नारायण श्रेष्ठले स्याङ्जा थिंक ट्यांकका पहलहरु सकारात्मक रहेको र वालिङका उद्यमी व्यवसायीहरुको तर्फबाट सक्दो सहयोग रहने बताउनुभयो ।
स्याङ्जा थिंक ट्यांकका सञ्चालक समिति सदस्य विवेक बस्यालले स्याङ्जा थिंक ट्यांकले युवा उद्यमीहरुलाई प्रोत्साहन गर्न र स्याङ्जामा उद्यमशीलताको लहर ल्याउन शिक्षा र उद्यमशीलतालाई जोड्दै हरेक विद्यालय र क्याम्पसमा ‘उद्यमी क्लब’ स्थापना गर्ने लक्ष्य रहेको जानकारी दिनुभयो । उक्त मेलामा शनिबार र आईतबार विभिन्न राष्ट्रिय तथा अन्तर्राष्ट्रिय उद्यमीहरुसँग अन्तक्रिया कार्यक्रमका साथै वक्तृत्वकला प्रतियोगिता समेत सञ्चालन गरिने कार्यक्रम संयोजक रश्मि पाठकले जानकारी दिनुभयो ।
संस्थाका अध्यक्ष दिनकर नेपालले स्याङ्जा थिंक ट्यांक युवाहरुको क्षमता विकास गर्ने मन्च रहेको र यसको परिकल्पना नै युवाहरुले आफ्नो चौतर्फी विकासका लागि प्रयोग गर्न सजिलो हुने गरि गरिएको बताउनुभयो ।

रोट्यार्याक्ट क्लब वालिङ र शाईन भिलेज इन्टर्नेसनल एकेडेमी सह-आयोजक रहेको मेलामा प्रतियोगितामा उत्कृष्ठ हुनेहरुलाई पुरस्कार प्रदान गरिने छ भने आई टी सीपमा रुचि देखाएका विद्यार्थीहरु मध्येबाट चिठ्ठमबमे माध्यामबाट ट्याबलेट प्रदान गरिने संस्थाले जनाएको छ ।