रामपुर,१४ जेठ- चुनाव आउदा नेताहरु लाइन लागेर घरघरमै पुग्ने र पराजय भएपछि पनि आफ्ना आफ्नै काममा व्यस्त रहने कुरा तपाईं हाम्रा लागी अनौठो होइन तर यता रामपुर नगरपालिकामा भने चुनाव सकिएपछि पनि चुनाव आएजस्तो लागेको मतदाताले भन्ने गरेका छन् ।

गएको बैशाख ३० गते भएको निर्वाचनमा पराजय बेहोरेका मेयर पदका उम्मेदवार शिव अर्याल तथा उपमयेयर पदका उम्मेदवार दुर्गादेवी राना लगायतको टिम यतिवेला घरदैलोमा जुटेको छ । झिनो मतान्तरले उपबिजेता बनेका उम्मेदवार घरदैंलोमा पुग्दा नागरिक नै अचम्ममा छन् ।

स्थानिय तहको निर्वाचनको मतगणना सकिए लगतै घरदैलोमा पुगेका उम्मेदवारसँग आफूहरुले चाहेर पनि बिजेता बनाउन नसकेकोमा मतदाता भक्कानिएर रोएका थिए । १० वटा वडा रहेको नगरको वडानम्बर १ देखी १० सम्म दैनिक रुपमा घरदैलो गरेर नागरिकसँग भेट्ने गरेको मेयर पदका उम्मेदवार अर्यालले बताउनुभयो ।

उहाँले जितको नजिक पुगेर पराजय बेहोर्नु परेकोमा आफू भन्दा धेरै मतदाता दुः खी रहेको उल्लेख गर्दै हारजित प्राविधिक प्राविधिक कुरा रहेपनि आफू जनतासँगै रहेकोमा जोड दिनुभयो । आफूलाई रामपुरको विकासमा हातेमालो गरेर अगाडी बढ्ने इच्छा लागेको अर्यालको भनाई छ ।

समृद्ध रामपुर सुखी रामपुरबासीको सपना साकार पार्ने अभियानमा लागेको जानकारी दिदै नेता अर्यालले आफूलाई थोरै मात्रै मतले बिजयी हुन नसकेको बताउनुभयो । मतदातालाई धन्यवाद दिदै घरदैलोमा पुगेका अर्यालले रामपुर नगरपालिकामा शिक्षा, स्वाश्थ्य, खानेपानी विद्युत , सडक लगायत विविध क्षेत्रमा योेजनागत रुपमा काम गरी आफू जन्मेको ठाउँको विकासमा लाग्ने इच्छा जाहेर गर्नुभयो ।

२०७४ र यसपाली गरी दुई पटक नै निर्वाचनमा पराजय भोगेकी उपमेयर पदका उम्मेदवार दुर्गादेवी रानाले आफू पराजयकै कारण हतोत्साहित नबनेको बताउनुभयो । यसपालीको निर्वाचनमा झिनो मतले पराजित दुर्गादेवी राना यतिबेला जनताको घरदैलो जाने क्रममा महिला दिदीबहिनीको समस्या लगायत गाउँघरका हरेक काममा नेतृत्वदायी भुमिका रहेको र त्यो निरन्तर हुने बताउनुभयो । गतबैशाख ३० गतेको निर्वाचनमा मेयर पदमा नेपाली कांग्रेसका रमणबहादुर थापाले १० हजार ४ सय ५६ प्रतिस्पर्धी अर्यालले १० हजार ८३ मत प्राप्त गर्नुभएको थियो । मेयर पदमा थापा र अर्यालविच ३ सय ७३ मतान्तर रहेको थियो ।

उपमेयर पदमा नेपाली कांगे्रसका बालकुमारी थापाले १० हजार ३ सय ७ तथा प्रत्यासी दुर्गादेवी रानाले १० हजार २ सय ५० मत प्राप्त गर्नुभएको थियो । उपमेयर पदमा ५७ मतान्तर रहेको थियो । पराजय बेहोरेपछि वा चुनाव जितेपछि गाउँमा नेता देख्न नपाइने भन्दै यसपाली भने घरदैलोमा आउदाँ सान्तवना मिलेको मतदाताले बताएका छन् ।