गल्याङ,१४ माघ– गल्याङ नगरपालिकाको आठौं नगरसभा बुधबार सम्पन्न भएको छ । नगरसभाले विभिन्न १३ बुँदे प्रस्ताव सर्वसम्मतले पारित गरेको छ ।
नगरसभामा नगरप्रमुख भुपराज अधिकारीले प्रस्तुत गर्नुभएको १३ बुँदे प्रस्ताव सर्वसम्मत पारित भएको हो ।
नगरसभामा २०७७÷०७८ को पुस मसान्तसम्मको नीति कार्यक्रम तथा बजेट कार्यान्वयनको समिक्षा गरी आम्दानी र खर्चको अनुमोदन गरिएको छ ।
यस्तै चालु आर्थिक वर्षको आर्थिक ऐन २०७७ लाई संशोधन गर्न बनेको आर्थिक ऐन पहिलो संशोधन विधेयक र सार्वजनिक खरिद नियमावली स्वीकृत गरिएको छ ।
यसै गरी विपन्न नागरिक आवास निर्माण कार्यक्रम, शिक्षा ऐन संशोधन पनि पारित गरिएको छ । नगरपालिकाको मुख्य बजार क्षेत्रको रुपमा बल्पुक, लल्याङ, गल्कोट, मुडकिल्ला तथा तल्लो गल्याङलाई समेटर बजार क्षेत्र निर्धारण गर्ने तय भएकोछ ।
यसै गरी दिमिक, जिमुहा, कर्मचौर लबरकोटदेखि सम्पास सम्मको भागलाई समेटेर एकिकृत धामिर्क नमूना वस्ती निर्माण गर्ने निर्णय पनि पारित भएको छ भने रकमान्तर सम्बन्धि योजनालाई पनि स्विकृत गरिएको छ । नगरवासीलाई विमाको पहुँचमा पु¥याउने सबै वडाका अति विपन्न परिवारलाई निशुल्क विमा कार्यक्रम सञ्चालन गर्नको लागि १५ लाख रुपैयाँ बजेट विनियोजन गर्ने निर्णय भएको छ ।

नगरसभा सदस्य हेमलाल विकप्रति शोक प्रस्ताव पनि पारित गरिएको छ ।
नगरसभाका एजेण्डा प्रस्तुत गर्दै नगरप्रमुख अधिकारीले पछिल्लो छ महिनामा नगरपालिका ३४.८८ प्रतिशत बजेट खर्च भएको जानकारी दिनुभयो । उहाँले कोरोना संक्रमणका कारण संघबाट बजेट कटौती भएको भन्दै सीमित बजेटबाट अधिकतम काम गर्नुपरेको बताउनुभयो ।

नगरप्रमुख अधिकारीले भन्नुभयो, ‘यस वर्ष बाढि पहिरो पनि बढि भयो, बजेट थप्नुपर्ने बेलामा नगरको प्रशासनिक भवन बनाउनुपर्ने कारणले पनि बजेट कटौती गर्नुपरेको अवस्था छ ।’
उहाँले नगरपालिका भित्रका विपन्न परिवारका लागि आवास निर्माण कार्यलाई निरन्तरता दिने समेत बताउनुभयो ।

नगरपालिकामा खानेपानीका ठूला आयोजना सञ्चालन, बाटो निर्माणका साथै कृषि क्षेत्रमा विभिन्न कामहरु भैरहेको नगरप्रमुख अधिकारीको भनाइ थियो ।
नगरप्रमुख अधिकारीले छोटो समयमा धेरै कामहरु भएपनि जनताका अपेक्षाहरु पुरा गर्न अझै धेरै काम गर्नबाकी रहेको बताउनुभयो । उहाँले भन्नुभयो, ‘तपाई हामी सबै जनप्रतिनिधिहरु जनताका बीचमा अझै बढि क्रियाशिल भएर जनतको सेवामा खटनुपर्ने हुन्छ । यसको लागि सबै आआफ्नो ठाउँबाट लागौं ।

नगरसभामा नगरपालिकाका १६ जना उत्कृष्ट कर्मचारीहरुलाई दोसल्ला, सम्मान पत्र र नगद सहित सम्मान गरिएको थियो ।