फाइल तस्विरः

वालिङ,१५ माघ– प्रत्येक वर्षको पौष शुक्ल पूर्णिमाका दिनदेखि सुरु हुने हिन्दू धर्मावलम्बीको श्रीस्वस्थानी व्रत कथा आजबाट सुरु भएको छ ।
पौष शुक्ल चतुर्दशीको दिन हात गोडाका नङ काटी, स्नान गरी, शुद्ध वस्त्र पहिरिएर व्रतको शुरुआत गरिन्छ । बिहान माघ स्नान गरी नित्य मध्याह्नकालमा महादेवको पूजा गरिन्छ । बेलुकी स्कन्द पुराणको केदार खण्डअन्तर्गत माघ माहात्म्यको कुमार अगस्त्यबीच संवाद भएको स्वस्थानी व्रत कथा सुन्ने सुनाउने परम्परा रहेको छ ।
प्रत्येक वर्ष पौष शुक्ल पूर्णिमादेखि माघ शुक्ल पूर्णिमासम्म एक महिनासम्म हरेक दिन घर(घरमा स्वस्थानीको कथा भन्ने र सुन्ने गरिन्छ । स्वस्थानीको व्रत बसे, कथा भने र सुनेमा मनोकांक्षा पूरा हुने धार्मिक विश्वास रहिआएको छ ।

आजैबाट काठमाडौंको शालीनदीमा स्वस्थानीको मेला सुरु भएको छ । गोमा ब्राह्मणीले सप्तऋषिले सिकाएको विधिअनुसार व्रत गर्दा पुत्र वियोगबाट मुक्ति मिलेको र व्रतकै प्रभावले छोरा नवराज लावण्य देश (हालको साँखु क्षेत्र)को राजा भएको कथासमेत स्वस्थानीमा वर्णन गरिएको छ । त्यसैले साँखुको शालीनदीमा स्वस्थानीमा विशेष मेला लाग्छ । यसैगरी स्याङ्जाको छाँयाछेत्र मन्दिर, सेतिवेणी, राम्दी लगायतका तिर्थ स्थलहरुमा सर्दालु भक्तजनहरुको घुइचो लाग्ने गर्दछ ।
माघ महिनामा शालीनदीमा स्नान गरेर माधवनारायणको दर्शन गरेमा पाप पखालिई पुण्य कमाइने धार्मिक विश्वास रहिआएकोले छ । प्रत्येक वर्ष लाखौँ भक्तजनहरु त्यहाँ पुग्ने गर्दछन् ।