स्याङ्जा,१४ माघ–कोरोना भइरस (कोभिड १९) विरुद्धको भ्याक्सिन स्याङजा पनि लगाउन शुरु गरिएको छ । भारत सरकारले सहयोग स्वरुप नेपाल सरकारलाई केही दिन पहिले कोरोना भाइरसको दश लाख डोज भ्याक्सिन उपलब्ध गराएको थियो । भारत सरकारले उपलब्ध गराएको सो भ्याक्सिन सरकारले जिल्ला जिल्लामा पठाए संगै आजदेखि देशैभरी लगाउन शुरु गरिएको हो । स्याङ्जा जिल्ला अस्पतालका प्रमुख मेडिकल सुपरीटेण्डेन चिकित्सक शुसिल मरासिनी र स्वास्थ्य कार्यालय प्रमुख यामप्रसाद शर्माले स्याङ्जामा पहिलो खोप लगाउनुभएको हो ।
आज बुधबार यो समाचार तयार पार्दा सम्म एक सय ३० जनाले खोप लगाईसकेका छन् भने आजै दुई सय ५० जनालाई खोप लगाउनेछन् । नेपाल सरकारले जिल्लाको लागि पठाएको १ सय ७१ भायल १७ सय १० डोज कोरोना भाइरस विरुद्धको भ्याक्सिन सोमबार प्रमुख जिल्ला अधिकारी उमेश बस्नेतले स्वास्थ्य कार्यालय स्याङ्जाका प्रमुख याम प्रसाद शर्मालाई हस्तान्तरण गर्नुभएको थियो ।
आजबाट लगाउन शुरु गरिएको खोप प्रथम चरणको हो । सरकारले जिल्लाको लागि पठाएको भ्याक्सिन पहिलो चरणमा स्वास्थ्यकर्मी, सरसफाइकर्मी, एम्बुलेन्स चालक, सुरक्षाकर्मी र शव व्यवस्थापनमा खटिने कर्मचारीहरुलाई लगाउने जिल्ला स्वास्थ्य कार्यालय स्याङ्जाका यामप्रसाद शर्माले जानकारी दिनुभयो ।