वालिङ,१३ मङ्सिर-भीरकोट नगरपालिका ६ उजेलीडाँडामा रहेको भाग्योदय माध्यमिक विद्यालयले स्वर्ण महोत्सव मनाउने भएको छ । 

विद्यालय स्थापनाको ५०औं वर्षको अवसरमा विद्यालयले यही आउदो माघ १२ देखि १४ गतेसम्म स्वर्ण महोत्सव मनाउने भएको हो । २०३३ सालमा स्थापना भएको विद्यालयले हालसम्म भएका विद्यालय निर्माण, आर्थिक सहयोग संकलन, भौतिक निर्माण, शैक्षिक उन्नयनमा भएको योगदान र कार्यको अभिलेखीकरण गर्दै शिक्षक, विद्यार्थीको अभिलेखका साथ विद्यालय संवद्ध लेख रचना सहितको संग्रह स्मारिका समेत प्रकाशन गर्नुका साथै स्वर्ण स्मारक स्तम्भ निर्माण गरिने बताइएकाे छ।

कक्षा १२ सम्म अध्ययन हुने विद्यालयमा १८ महिने कृषि बाली विज्ञान समेत अध्यापन हुँदै आएको छ भने कक्षा १० का विद्यार्थीहरुलाई आवसिय कक्षा समेत संचालन गर्दै आएको छ । 

स्वर्ण महोत्सव सम्पन्न गर्न २० लाख रुपैँया खर्च हुने अनुमान गरिएको छ । स्वर्ण महोत्सव गर्न भीरकोट नगरपालिका निर्वतमान नगरप्रमुख छायाराम खनालको संयोजकत्वमा ५०१ सदस्यीय मूल समारोह समिति गठन गरि कार्य अगाडि बढाईएको छ । शुक्रबार गरिएको पत्रकार सम्मेलनमा स्वर्ण महोत्सवका बारेमा विद्यालय व्यवस्थापन समिति अध्यक्ष तथा संयोजक खनालले जानकारी गराउनुभएको थियो ।