गोपाल जिटी
वालिङ,२६ असोज–स्याङ्जाका क्रियाशील पत्रकारहरुद्वारा अन्तरक्रिया गरिएको छ । पत्रकारिता क्षेत्रको विगत, वर्तमान र भविष्यको सम्भावना एवम चुनौति विषयमा अन्तरक्रिया गरिएको थियो । जिल्लामा क्रियाशील पत्रकारहरुकाबीच पत्रकारिता क्षेत्रको विकास तथा थप प्रभावकारी बनाउने उद्देश्यले अन्तरक्रिया कार्यक्रम शनिबार भीरकोटमा गरिएको हो । स्याङ्जाको विकास, समृद्धि र जनताको आवाजको बलियो प्रतिनिधित्व सञ्चार क्षेत्रले गराउने र बदलिँदो परिस्थितिमा मिडियाको भूमिका जिम्मेवार, निष्पक्ष र जवाफदेही बनाउन हातेमालो गर्ने विषयमासमेत छलफल भएको थियो ।
अन्तरक्रियाको साथमा पत्रकारहरु बीचको छलफल एवम् विमर्शले ९ बुदे घोषणापत्र जारी गरेको छ ।
यस्तो छ भीरकोट घोषणापत्र २०८२ !
१) स्याङ्जा जिल्लाभर विभिन्न संचारमाध्यमहरूमा क्रियाशील पत्रकारहरूबीच मैत्रीपूर्ण सहकार्य एवम् सम्बन्ध स्थापित गर्न जोड दिने ।
२) स्याङ्जाको पत्रकारीताको ऐतिहासिक दस्तावेज तयार पार्न सबै क्रियाशील पत्रकार एकजुट भएर काम अगाडि बढ्ने ।
३) पेशागत मर्यादालाई उच्च प्राथमिकतामा राख्दै पत्रकारको पेशागत सुरक्षा र आत्मसम्मानप्रति एकताबद्ध र दृढ रहने वातावरण गराउने ।
४) स्याङ्जाका आम नागरिकको जनबोलीको प्रतिनिधित्व गर्दै नैतिक, सभ्य र मर्यादित समाज निर्माणमा मिडिया मार्फत सकारात्मक र सिर्जनात्मक भूमिका खेल्ने ।
५) सिद्धार्थ राजमार्ग स्तरोन्नतिका लागि सरोकारवाला निकायको तत्काल ध्यानाकर्षण गराउने ।
६) स्याङ्जाको आन्तरिक एवम् बाह्य पर्यटन प्रवद्र्धनको लागि सञ्चार माध्यमबाट पहल गर्दै सरोकारवाला निकायबीच हातेमालो गर्ने !
७) जिल्लास्थित सरकारी निकायहरूले प्रकाशन गर्नुपर्ने टेण्डर, सूचना, लोककल्याणकारी विज्ञापन एवम् विभिन्न सूचनाहरू स्याङ्जामा सञ्चालित सञ्चारगृहहरूमा उच्च प्राथमिकताकासाथ प्रकाशित गर्न गराउन सम्बद्ध निकायको ध्यानाकर्षण गराउने ।
८) स्याङ्जा जन्मथलो भई स्वदेश तथा विदेशमा रही पत्रकारितामा सक्रिय सबै कलमजीविहरुलाई भावनात्मक ढङ्गले एकजुट गराउने ।
९) स्याङ्जाको पत्रकारितामा पत्रकार महासंघलाई अगुवा संस्थाको रूपमा लिदै यसलाई गतिशील र शसक्त बनाउन सबै कृयाशील पत्रकारहरु एकजुट हुने ।
बोधार्थ ः
नेपाल पत्रकार महासंघ, स्याङ्जा
जिल्ला प्रशासन कार्यालय, स्याङ्जा
नेपाल पत्रकार महासंघ, गण्डकी प्रदेश
स्याङ्जाको सबै स्थानीय तहहरु
अनलाइन मिडिया द्वय खबर कलम डट कम र स्मार्ट अखबार तथा अकला आवाज साप्ताहिकको संयुक्त आयोजनामा भीरकोट नगरपालिकाको सभाहलमा अन्तरक्रिया कार्यक्रम गरिएको थियो ।