गोपाल जिटी
वालिङ,१९ भदौ–स्याङ्जाको वालिङमा रक्तदान कार्यक्रम गरिएको छ । वालिङ १० फूलबारीस्थित पूर्णामृत भवानी माध्यमिक विद्यालयमा गरिएको कार्यक्रममा ४० जनाले रक्तदान गरेका छन् । विद्यालयको नेपाल जुनियर युवा रेडक्रस सर्कलले ६३ औं स्थापना दिवसका अवसरमा रक्तदान कार्यक्रम आयोजना गरेको हो । विद्यालयका अभिभावक बलराम चौधरीका दम्पतिबाट सुरु भएको कार्यक्रममा ४० जनाले रक्तदान गरेका छन् । रक्तदान कार्यक्रमको सहजिकरण नेपाल रेडक्रस सोसाइटी स्याङ्जा शाखाले गरेको थियो । विद्यालय प्राङ्गणमा आयोजित कार्यक्रममा अभिभावक, शिक्षक, राष्ट्रसेवक कर्मचारी, विभिन्न सामाजिक संघ संस्थामा आवद्ध व्यक्तिहरु तथा विद्यार्थीहरुले रक्तदान गरेका छन् ।
कार्यक्रममा स्वागत गर्दै विद्यालयका निवर्तमान प्रधानाध्यापक विष्णु अर्यालले आफूसँग भएको रगतदिनु भनेको वास्तवमै जीवनदान बताउनुभयो । उहाँले आँफुसँग यसै जम्मा भैरहेको रगत दानले अरुको जीवन बचाउने हुँदा वास्तवमै जीवनदान भएको उल्लेख गर्नुभयो । यस्ता कार्यक्रमहरु हामीले गर्दैजानुपर्ने अर्यालले बताउनुभयो । उहाँले भन्नुभयो, “रगत भनेको पलाई रहने वा वृद्धि भइरहने वस्तु हो, जति दियो त्यति बढ्दैजान्छ । हामीले तीन महिनाको अन्तरालमा दिन सकिन्छ । त्यसैले यस्ता कार्यक्रमहरु नियमितरुपमा गर्दै जानुपर्दछ । जसले गर्दा आफूसँग भएको अमूल्य वस्तु दानले अरुको जीवन बचाउन र जीवन सुरक्षित गर्न सकिन्छ ।” त्यसैले रेडक्रस स्थापना दिवसका अवसरमा यस पटक रक्तदान कार्यक्रमलाई प्राथमिकता दिएर आयोजना गरिएको अर्यालको भनाई थियो ।
विगतका वर्षहरुमा सामाजिक सचेतनासम्बन्धी विभिन्न कार्यक्रमहरु गर्दै आइएको थियो भने यस पटक रक्तदान कार्यक्रम गरिएको विद्यालयले जनाएको छ । विद्यार्थीहरुलाई रक्तदानको महत्वको जानकारी गराउने र रेडक्रसको स्थापना दिवसलाई नयाँ कार्यक्रमसहित मनाउने उद्देश्यले पनि अहिले रक्तदान कार्यक्रम गरिएको हो ।