वालिङ,५साउन- वालिङ नगरपालिका १३ मा रहेको आँधिखोला बहुप्राविधिक शिक्षालयले सरसफाई कार्यक्रम गरेको छ । शिक्षालयले वालिङको भकुण्डे देखि वालिङ मोड हुदै तल्लो वालिङ, भुम्रे, ठोडोलाईन लगायतका बजारको मुख्य भागको सरसफाई गरिएको आँधिखोला बहुप्राविधिक शिक्षालयले जनाएको छ ।
भकुण्डे चोक देखि शिक्षालयको व्यानरसहित शिक्षालयका विद्यार्थी प्रशिक्षक एवं कर्मचारी सुरक्षा कर्मी सहितको सहभागितामा बजार क्षेत्रको सरसफाई गरिएको हो ।

सरसफाई कार्यक्रममा वडा प्रहरी कार्यालय र ट्राफिक कार्यालय वालिङले सहजिकरण गरेको थियो । कार्यक्रमका सहभागीहरुले सडक छेउछाउ तथा बजार अगाडि फालिएका फोहर टिपेर बोरामा जम्मा गरेकाथिए । जम्मा पारिएका फोहरलाई कुहिने र नकुहिने छुट्ट्याई नगरपालिकाको फोहर व्यवस्थापनको गाडीमा पठाइएको छ ।
बजार तथा टोल छिमेकमा हुने फोहरले वातावरण प्रदुषित हुनुका साथै गर्मीको समयमा विभिन्न रोग फैलिनुका साथै बजारको सौन्दर्यतामा पनि ह्रास आउनेभएकोले सरसफाई सम्बन्धी सचेतना फैलाउने उद्देश्यले कार्यक्रम गरिएको आँधिखाला बहुप्राविधिक शिक्षालयका कार्यक्रम संयोजक नवराज पौडेलले जानकारी दिनुभयो ।
शिक्षालयले हरियालीसँगै स्वच्छ वातावणमा टेवा पुर्याउने योजना अनुसार केही दिन पहिले शिक्षालय परिसरमा विभिन्न प्रजातिका २ सय ५० बिरुवा समेत रोपेको थियो ।

आँधिखोला बहुप्राविधिक शिक्षालयमा तीन वर्षे डिप्लोमा इन सिभिल ईन्जिनियरिङ र आइटी ईन्जिनियरिङमा असार २९ देखि फारम खुल्ला गरिएको छ । दुवै विषयमा ४८/४८ सीटका लागि साउन १२ गतेसम्म फारम भर्न सकिने र २४ गते प्रवेश परीक्षा हुने शिक्षालयले जनाएको छ ।
आँधिखोला बहुप्राविधिक शिक्षालयमा प्राविधिक शिक्षा अध्ययनको लागि वालिङ नगरपालिकाले प्रत्येक वडाबाट आर्थिक अवस्था कमजोर भएका २/२ जनालाई विद्यार्थीलाई निशुल्क अध्ययनको लागि छात्रवृत्ती समेत उपलब्ध गराउदै आएको छ ।