वालिङ,१ माघ–निजी तथा आवासीय विद्यालयको छाता सङ्गठन प्याव्सनका केन्द्रीय अध्यक्ष कृष्णप्रसाद अधिकारीले देशको पूर्ण शिक्षाको जिम्मा निजी विद्यालयले लिन डराउन नहुँने बताउनु भएको छ । विहिबार स्याङ्जाको वालिङ ८ मा रहेको नेपाल आदर्श आवासीय विद्यालयको २८ औं वार्षिकोत्सव तथा अभिभावक दिवसको उद्घाटन गर्दै प्याव्सन अध्यक्ष अधिकारीले यस्तो बताउनुभएको हो । गाउँमा भएका सामुदायिक विद्यालयहरुमा ५ जना विद्यार्थीका लागि पाँचैजना शिक्षक छन्, त्यो हामीले तिरेको करको पैसा हो अध्यक्ष अधिकारीले भन्नुभयो । यसरी पढाएर नहुने भन्दै उहाँले अब देशको पूर्ण शिक्षाको जिम्मा निजी विद्यालयले लिन डराउन नहुँनेमा जोड दिनुभयो । उहाँले भन्नुभयो,“गाउँमा भएका सामुदायिक विद्यालयहरुमा ५ जना विद्यार्थीका लागि पाँचैजना शिक्षक छन्, त्यो हामीले तिरेको करको पैसा हो । यसरी पढाएर हुँदैन । सरकारले उत्पादनमूलक ठाउँमा लगानी गर्नुपर्छ ।” त्यस्ता १५ हजार विद्यालय मर्च गर्नुपर्ने अवस्थामा रहेको र त्यसको व्यवस्थापनमा व्याव्सनले सचिवज्यूहरुसँग मिलेर विभिन्न कुराहरुमा काम अगाडि बढाएकोसमेत उहाँले उल्लेख गर्नुभयो ।

यसैगरी निजी विद्यालयका शिक्षक र फाउण्डरहरु ढुक्कसँग निदाउन नहुनेमा प्याव्सनका केन्द्रीय अध्यक्ष अधिकारीले बताउनुभयो । यस्तो भाष्यको विकास गर्नुपछ र सरकारी विद्यालयलाई पनि सिकाउन जरुरी रहेको छ । उहाँले भन्नुभयो,“विद्यार्थीको भविष्य र अभिभावकहरुको सपना तपाईंहरुको नीदमा आउन जरुरी छ । यस्तो भाष्य सरकारी विद्यालयलाई पनि आपसमा राखेर सिकाउन जरुरी छ ।” यसका लागि मित्रता र सहयोगका आधारमा भावना राखौं व्याव्सनका अध्यक्ष अधिकारीले थप्नुभयो । हामी मित्रता र सहयोगका आधारमा प्रयत्न गरौं, त्यति गर्दा पनि सरकारी विद्यालयहरु राम्रो भएनन् भने देशको पूर्ण शिक्षाको जिम्मा लिन डराउन नहुँने अध्यक्ष अधिकारीले जिकिर गर्नुभयो । 

यसैगरी कार्यक्रममा वालिङ नगर प्रमुख कृष्ण खाँणले शिक्षाको पहुँच र गुणस्तरको विकास गर्ने लक्ष्य लिएर अगाडि बढेको बताउनुभयो । उहाँले स्थानीय सरकारले शिक्षालाई पहिलो आधार मानेर विद्यार्थीहरुका लागि नविन कार्यहरु सञ्चालन गर्दै आएको जानकारी दिनुभयो । यसका लागि बजेट छुट्याएर लागेका छौं । विद्यार्थीहरुबीच समानता, अनुशासन र पोशाकमा एकरुपता ल्याउनका लागि ४० लाख विनियोजित गरिएको नगर प्रमुख खाँणले व्यक्त गर्नुभयो । यसकासाथै निजी विद्यालय प्रोत्साहनका लागि १५ लाख र दुर्गम तथा विपन्न वर्गलाई लक्षित गरेर अतिरिक्त सिकाईका लागि ८ लाख बजेट व्यवस्था गरिएको छ । यसले शिक्षाको पहुँच र गुणस्तर दुबै सुनिश्चित गर्ने लक्ष्य लिइएको नगर प्रमुख खाँणको भनाई थियो । 

२०५४ सालमा स्थापना भएको र वालिङ ८ मा रहेको विद्यालयले आफ्नो २८ औं वार्षिकोत्सव तथा अभिभावक दिवस मनाएको हो । 

कार्यक्रममा विद्यार्थीहरुलाई पुरस्कार वितरण र उत्कृष्ट शिक्षक तथा कर्मचारीलाई सम्मानसमेत गरिएको थियो । सहायक क्याम्पस प्रमुख शेषकान्त कडेलको स्वागतसँगै सुरु भएको कार्यक्रममा क्याम्पस प्रमुख होमकान्त गौतमले प्रतिवेदन प्रस्तुत गर्नुभएको थियो । विद्यालयमा पूर्व प्राथमिकदेखि माविसम्म १ हजार २ सय ७५, प्लसटु र क्याम्पसतहमा ७ सय ५९ गरी २ हजार ३४ जना विद्यार्थी अध्ययनरत छन् ।