वालिङ,६ माघ- वालिङ नगरपालिका ७ धोडेपानी स्थित वालिङ- चापाकोट सडकखण्डमा लु ३ त ५१७३ नम्बरको ट्याक्टर दुर्घटना हुदा दुई जनाकाे मृत्यु भएकाे छ भने चार जना घाइते भएकाछन्।

वालिङबाट ढुङ्गा लिएर चापाकोट तर्फ जाँदै गरेको ट्याक्टर अनियन्त्रित भई दुर्घटना हुदा सडक देखि करिब १० मिटर तल खोल्सामा खसेकाे जिल्ला प्रहरी कार्यालय स्याङ्जाले जनाएकाे छ।

 दुर्घटनामा परि वालिङ नगरपालिका ७ केवरे बस्ने ६५ वर्षिय डोलराज कोईराला र कैलाली टिकापुर नगपालिक ७ का ३५ वर्षिय राज कुमार चौधरीलाई चिकित्सकले मृत घोषणा गरेको प्रहरीले जनाएकाे छ ।

घटनामा परि घाइते हुनेहरुमा ट्याक्टर चालक पश्चिम नवलपरासी सरल गाउँपालिका १ अनन्दनगरका २८ वर्षिय लाल बहादुर सुनार कैलाली लम्की नगरपालिका ५ पांचचौरका २२ वर्षिय श्याम चौधरी, साेही ठाउँका ३९ वर्षिय लक्ष्मण चौधरी, दाङ राप्ती गाउँपालिका ५ का ३५ वर्षिय हुकुम बहादुर दर्लामी मगर घाइते भएकाे र घाइतेहरु उपचारकाे लागि पाेखरा लागिएकाे प्रहरीले जनाएकाे छ।