मणी प्रसाद अर्याल
वालिङ,१३ साउन- वालिङ नगरपालिकाले पशुपालक किसानलाई प्रति लिटर रु १० रुपैँयाका दरले अनुदान उपलब्ध गराएको छ । नरपालिकाबाट अनुदान पाए संगै दूग्ध उत्पादक किसानहरु उत्साहीत भएका छन् ।
नगरपालिकाले झण्डै सवा सात लाख अनुदान रकम वितरण गरेको हो । आर्थिक वर्ष २०८०/०८१ को गाईभैंसी प्रवद्र्धन शिर्षक अन्तर्गत किसानहरुलाई प्रति लिटर रु १० रुपैयाँका दरले अकला नमूना साना किसान कृषि सहकारी सहित ४० जना किसानलाई आइतबार ७ लाख १६ हजार ९ सय २ रुपैयाँ अनुदान रकम वितरण गरिएको नगरपालिकाले जनाएको छ ।
वालिङ नगरपालिका ८ मा मुख्य कार्यालय रहेको अकला नमूना साना किसान कृषि सहकारीले रु १ लाख ७४ हजार रुपैयाँ अनुदान प्राप्त गरेको छ । यसैगरी सबैभन्दा बढि वालिङ १३ गाहखोलाका छविलाल गैह्रेले रु ४४ हजार २ सय २५ रुपैयाँ अनुदान प्राप्त गर्नुभएको छ ।
अनुदान रकमको चेक हस्तान्तरण गर्दै वालिङ नगरपालिकाका नगर प्रमुख कृष्ण खाँणले सीमित स्रोत र साधनका बावजुद पनि किसानहरुलाई सहयोग पुगोस भने यस प्रकारको कार्यक्रम सञ्चालन गरिएको बताउनुभयो ।
नेपाललाई कृषि प्रधान देश भनिएपनि व्यवहारमा भने त्यस्तो नदेखिएको र अन्य क्षेत्र भन्दा कृषि क्षेत्र पछाडी परेको बताउदै सुखी नगरवासी र समृद्ध वालिङको नारालाई सार्थक बनाउन यो कार्यक्रमले महत्वपूणै भूमिक खेल्ने नगरप्रमु खाँणको भनाइ रहेको छ ।
यसैगरी नगर उपप्रमुख कविता तिवारीले बाटो घाटो, शिक्षा स्वास्थ्यसँगै मानव संसाधनको पनि विकास गर्न आवश्यक रहेको बताउनुभयो । उहाँले मानव संसाधनको विकासलाई मुख्य ठानेर कृषिमा अनुदानका कार्यक्रम अगाडि सारेको बताउनुभयो । यो वर्ष दूधमा अनुदानसँगै एउटा गाई खरिदका लागि रु ५० हजार अनुदान सहयोग गर्ने कार्यक्रम लागु गरिएको बताउनुभयो ।
कृषकहरुको उत्थानका लागि दुईदेखि पाँचवटासम्म गाईपाल्न किसानहरुलाई एक ओटा गाई खरिद वापत रु ५० हजार रुपैयाँ अनुदान दिने कार्यक्रम लागु गरिएको जानकारी दिनुभयो ।