वालिङ,५ जेठ– वालिङ उद्योग वाणिज्य संघले कोरोना भाइरस (कोभिड–१९) को दोस्रो भेरियन्टले माहमारीको रुप लिएको अवस्थामा आवस्यक परेमा संघको सिटी हललाई आइसोलेसन सेन्टर निर्माणको लागि उपलब्ध गराउने जनाएको छ । पछिल्लो समय कोरोनाको नयाँ भेरियन्टका कारण वालिङमा संक्रमित तथा मृत्युदर बढिरहेका बेला संक्रमणको नियन्त्रणका लागि व्यापारी व्यवसायीको भूमिका एवं ब्यावसायीहरुलाई परेको समस्याका बारेमा छलफल गरिएको हो ।

संघले लकडाउनको पुर्ण पालना गरी अत्यावश्यक सेवा प्रवाहमा सर्भसुलभ दरमा सामान खरिदविक्रि गर्न व्यापारीहरुलाई आग्रह गरेको छ ।
संघका अध्यक्ष शोभाकान्त पौडेलले क्रमणको जोखिमलाई मध्यनजर आवस्यक परेमा वालिङ नगरपालिका र गह्रौँ प्राथामिक अस्पतालको सहयोगमा सिटीहललाई आइसोलेसन सेन्टरको रुपमा निर्माण गर्ने बताउनुभयो । अध्यक्ष पौडेलले भन्नुभयो, ‘हाम्रो संघको कार्यसमिति बैठक बसेर कोरोनाका कारण सिर्जित पछिल्लो अवस्थाका बारेमा छलफल भएको छ । कोरोनाको संक्रमणको नियन्त्रणका लागि सक्दो सहयोग गर्न हामी प्रतिवद्ध छौँ ।’

बैठकले विभिन्न ब्यवसायिक संघसंस्था, सहकारीहरु, हार्डवयर ब्यवसायी, अटो इञ्जिनियरिङ ब्यवसायी, विद्युत ब्यवसायी लगायतका वस्तुगत संघहरु र उद्योगी ब्यवसायीहरुले वालिङको कोभिड–१९ राहत कोष एवं गह्रौँ प्राथामिक अस्पताललाई विभिन्न पक्षबाट उपलब्ध गराउनुभएको सहयोगको समेत उच्च सम्मान गर्दै आभार प्रकट गरेको संघका महासचिव केशरबहादुर खाँण (धु्रव) ले बताउनुभयो ।
त्यसैगरी कोभिड–१९ को महामारीका समयमा उद्योगी ब्यापारी ब्यवसायीहरुमा परेका समस्याहरुको सहजीकरणका लागि विभिन्न क्षेत्रको लागि पूर्व गठित टोल समितिहरुलाई सक्रिय गराउँदै जिम्मेवारी प्रदान गरेको संघले जनाएको छ ।