वालिङ,१७ माघ– गायिका कमला अधिकारीको स्वरमा समसामयिक सामाजिक परिवेशमा आधारित नयाँ गीतको म्युजिक भिडियो सार्वजनिक भएको छ । ‘मुना’ बोलको यो गीत युट्युव च्यानल जोजस क्रियशन प्रलिबाट शनिबार सार्वजनिक भएको हो । गीतमा कमला अधिकारीकै शब्द तथा लय रहेको छ भने गणेश अधिकारी, पुष्पा न्यौपाने र अंशु खनालद्वारा अभिनित म्युजिक भिडियोमा स्वामी ध्यान गगनको कथा तथा परिकल्पनालाई विष्णु भट्टराईले निर्देशन गर्नुभएको छ । दुर्गम गाउँमा हुर्किएकी चेली, विदेशिन बाध्य उनका पिता र अभावै अभावको एक्लो जीवनमा खेप्नुपरेको उनको आमाको पीडासहितको जीवन वृत्तान्तलाई म्युजिक भिडियो मार्फत रोचक ढङ्गले प्रस्तुत गरिएको छ । शिक्षण पेशामा आवद्ध कमला अधिकारी गायन सँगै लेखन कार्यमा समेत सक्रिय हुनुहुन्छ । अधिकारीको यस गीति कथामा आधारित पुस्तक मुना पनि छिट्टै बजारमा आउँदैछ ।
गायिका अधिकारीले आफ्नो यो पहिलो प्रयास भएको बताउदै आफु सानै हुदादेखिको सपमा पुरा भएकोमा निक्कै खुसी लागेको गण्डकी समाचार डट कमलाई बताउनुभयो । अग्रजहरुको मार्गदर्शनबाट नै गायन क्षेत्रमा लाग्ने प्रेरणा मिलेको बताउदै अधिकारीले भन्नुभयो, “शिक्षाले बुद्धिको विकास गर्छ त्यसरी नै कलाले हृदयको विकास गर्छ ।”त्यसैले म बुद्धि र हृदय दुवैलाई संगसंगै विकासको गतिमा अगाडी बढाउने योजना अनुसार यस क्षेत्रमा लागे ।