वालिङ,१० भदाै- स्याङ्जामा कर्तव्य ज्यान मुद्दाका ८ जना पक्राउ परेका छन् । कर्तव्य ज्यान मुद्दाका ८ जना पक्राउ गरिएको जिल्ला प्रहरी कार्यालय स्याङ्जाले जनाएकाे छ।

पक्राउ पर्नेहरुमा हरिनास गाउँपालिका ५ का २२ वर्षीय सिजन थापा, बलिकोटका २० वर्षीय विवेक मानन्धर, २३ वर्षीय गोरे भन्ने गुरुप्रसाद लम्साल, १७ वर्षीय आर्यन क्षत्री, २३ वर्षीय विश्वास वाग्ले र वडा नम्वर ६ का २२ वर्षीय निशान थापा रहेका छन् । यसैगरी चापाकोट नगरपालिका वडा नम्वर ५ काम्तीका २४ वर्षीय अनिल शाही र १८ वर्षीय बादल बिक गरी ८ जना कर्तव्य ज्यान मुद्दामा पक्राउ परेका हुन् ।

पक्राउ पर्नेहरु यही भदौ ७ गते राती अन्दाजी ११ बजेको समयमा वालिङ नगरपालिका ५ को जर्कोटमा चर्को आवाजमा मोटरसाइकल चलाएको विषयमा स्थानीय बाहुनडाँडाका ढालबहादुर थापासँग वादविवाद भएको थियो । सोही क्रममा ३२ वर्षीय थापालाई कुटपिट गरी घाइते भएका थिए । तत्काल उपचारका लागि गण्डकी मेडिकल कलेज पोखरा लगिएकोमा भोलिपल्ट ८ गते विहान चिकित्सकले थापालाई मृत घोषणा गरेका थिए । कुटपिटमा संलग्नहरुलाई अनुसन्धान गर्दैजाँदा जिल्ला प्रहरी कार्यालय पुतलीबजार, वडा प्रहरी कार्यालय वालिङ र मातहतबाट खटिएको अप्रेसन टोलीले जिल्लाका विभिन्न स्थानबाट पक्राउ गरिएका हुन् ।