मणी प्रसाद अर्याल
वालिङ,३० फागुन- वालिङ नगरपालिकाले कृषकलाई प्रति लिटर दुधमा १० रुपैयाँ अनुदान दिने भएको छ । आर्थिक वर्ष २०८०/०८१ को विनियोजित बजेट मार्फत दुधमा आत्मनिर्भर कार्यक्रम तथा गाई भैसी प्रवद्धन कार्यक्रम अन्तरगत वालिङ नगरपालिका र अकला नमुना कृषि सहकारी संस्था विच सम्झौता भएको नगरप्रमुख कृष्ण खाँणले जानकारी दिनुभयो ।
अकला नमुना कृषि सहकारी संस्थाले उपलब्ध गराएको पास बुकमा भएको विवरणको आधारमा नगरपालिकाले प्रति लिटर दुधमा १० रुपैयाँ उपलब्ध गराउनेछ । नमुना कृषि सहकारीले नगरपलिकाको सम्झौता अनुसार दैवि प्रकोपको अवस्थामा बाहेक वार्षिक कम्तीमा ३५० दिन किसानको दुध खरिद गर्नुपर्नेछ । सहकारी संस्थाले हरेका एक महिनामा दुई पटक संकलित दुधको विवरण वालिङ नगरपालिकालाई विवरण उपलब्ध गराउने छ । दुधको मुल्य नेपाल सरकारले तोकेको फ्याट र एसएनएफको आधारमा मुल्य निर्धारण गर्ने छ ।
सम्झौतामा हस्ताक्षर गर्दै नगर प्रमुख कृष्ण खाँणले वालिङ नगरपालिकालाई दुधमा आत्मानिर्भर बनाउन र उत्पादनका आधारमा कृषकलाई अनुदान दिदा कृषक पनि उत्साहित हुने र युवा पुस्तामा कृषि फर्महरु सञ्चालन गर्न उत्साहित हुने विश्वास व्यक्त गर्नुभयो ।
वालिङ नगरपालिकाले गाई पाल्ने कृषकलाई अधिकतम ५० हजार रुपैया सम्म सहयोग अनुदान दिने पनि जानकारी गराउनुभयो ।
स्वदेशमै बस्ने युवा र विदेशबाट फर्केका युवाहरुको आकर्षणका निम्ती नगरपालिकाले बजार व्यवस्थापनको ग्यारेन्टी संगै औषधि, विमा र सडक व्यवस्थापनमा नगरपालिका प्रतिबद्ध रहेको नगर उपप्रमुख कविता तिवारीले जानकारी दिनुभयो ।
कृषकहरुको सहजतालाई मध्यनजर गर्दै दुध संकलन केन्द्र हालको लागि वालिङ नगरपालिका वडा न १२ धनमुढा, वडा न १४ फौदिखोला, वडा न ४ को एलादिमा राख्ने र दुधको उत्पादनको आधारमा संकलन केन्द्र स्थापना गर्ने अकला नमुना कृषि सहकारी संस्थाका अध्यक्ष पुण्य प्रसाद अर्यालले जानकारी दिनुभयो ।
वालिङ नगरपालिका भित्र ७०० घरधुरीले गाई/भैसी पालेर औषतमा दिनको ५०० लिटर दुध उत्पादन गरि बजारमा बेच्ने नगरपालिकाको कृषि शाखाले अनुमान गरेको छ ।