वालङि,१४ असार-आज आषाढ शुक्ल एकादशीका दिन घर घरमा तुलसीको बिरुवा रोपेर पूजाआजा गर्ने गरिन्छ । सनातन वैदिक परम्पराअनुसार तुलसीलाई विष्णुको प्रतीकका रुपमा मानिन्छ । आजदेखि कार्तिक शुक्ल एकादशीका दिनसम्म तुलसीको विशेष पूजा गरिन्छ ।

आषाढ शुक्ल एकादशीदेखि कार्तिक शुक्ल एकादशीसम्म चार महिना भगवान् विष्णु क्षीरसागरमा शयन गर्नुहुने भएकाले आजको दिनलाई हरिशयनी एकादशी भनिएको हो ।

भगवान् विष्णु शयन गर्नुहुने चार महिनालाई चतुर्मासा पनि भनिन्छ । यस वर्ष भने साउन महिनामा अधिकमास परेकाले पाँच महिना हुने भएको छ । एक वर्षमा २४ एकादशी पर्छन् । यस वर्ष भने अधिकमासका दुईसमेत गरी २६ एकादशी परेका छन् । एकादशीमा फलाहार खाएर व्रत बस्ने चलन रहि आएको छ ।

हरिशयनी एकादशीका अवसरमा आज बिहानैदेखि धार्मीक स्थलहरुमा दर्शनर्र्र्र्र्थीहरुको भिड लागेको छ । स्याङ्जाका धार्मीक स्थलहरु सेतीवेणी, राम्दी लगायतका ठाउँमा सर्दालु भक्तजनहरुको भिड लागेको छ भने काठमाडौँ लगायतका धार्मीक स्थलहरुमा दर्शनार्थीहरुको भिडलागेको छ । चार महिनासम्म विधिपूर्वक पूजा आराधना गरिएको तुलसीलाई कार्तिक शुक्ल एकादशी अर्थात् हरिबोधिनी एकादशीका दिन दामोदरसँग विवाह गरिदिने वैदिक विधि छ ।