फाइल तस्विरः

कला राना

वालिङ,१३असार- असार पन्ध्र नजिकिदै आउँदा स्याङ्जामा १० प्रतिशत मात्र रोपाईं सम्पन्न भएको छ ।
यसपटक पर्याप्त मात्रामा वर्षा नहुँदा असार दोस्रो साता आईपुग्दा पनि जिल्लामा १० प्रतिशत मात्र रोपाईँ गरिएको कृषि ज्ञान केन्द्रका प्रमुख विनोद हमालले जानकारी दिनुभयो । सामान्य तय रोपाइँ असार पन्ध्र पछि नै गर्दा राम्रो भए पनि कृषकहरुले बाँझो जग्गा तथा मकै भएका खेतहरुमा जेठ अन्तिम साताबाटै छिटै रोपाइँ गर्ने गरेकाछन् । गत वर्ष यहि अवधिमा २० प्रतिशत रोपाइँ सकिएको थियो ।
तुलनात्मक रुपमा यो वर्ष समयमै पानी नपर्दा रोपाँई ढिला सुरु भएको हो । अझै पनि मुल फुट्ने गरी पानी नपर्दा यो वर्ष साउन अन्त्मि हप्तासम्मै रोपाईँ हुने अनुमान गरिएको छ । फेदीखोला, आँधीखोला, पुतलीबजारलगायतका पालिकाहरुमा १५ देखि २० प्रतिशत रोपाइँ गरिएको छ भने तल्लो बेल्ट चापाकोट, कालीगण्डकीमा भने २ प्रतिशत रोपाइँ गरिएको छ । वालिङ भीरकोटमा ५ प्रतिशत रोपाइँ सकिएको केन्द्रले जनाएको छ ।
विभिन्न हाईब्रिट जातका धानहरु बजारमा भित्रिएपनि स्याङ्जाका कृषकहरुले उन्ननत जातको धान नै लगाउने गरेकाछन् । हाईब्रिटमा छिटै रोगकिराले आक्रमण गर्ने भएकाले कृषकहरु उन्नत जातका धानमा आर्कषित भएकाछन् । सावित्रि, सुनौलो सुगन्धलगायतका उन्नत जातका धान नै स्याङ्जाका किसानले लगाउँदै आएको केन्द्रका प्रमुख हमालले बताउनुभयो ।
उन्नत जातको धानका लागि जिल्लामा १५ वटा बिउ उत्पादन गर्ने समुह छन् । ती समुहले उत्पादन गरेका उन्नत जातका धान जिल्लामा पुगेर पनि अन्य जिल्लामा निर्यात भएको कृषि ज्ञान केन्द्रले जनाएको छ । जिल्लामा अझै पनि १२ प्रतिशत क्षेत्रफलमा परम्परागत गुडुला, जर्नेलीलगायतका धान रोप्ने गरेकाछन भने १५ प्रतिशत हाईब्रिट लगाउने गरेका छन् ।
स्याङ्जाका आँधीखोला किनार, कालीगण्डकी नदी किनार, ज्याग्दीखोला किनार, चापाकोट टार, रत्नपुर, कुवाकोट, गल्याङका क्षेत्र, सेतीदोभान फाँटहरु र विरुवा फाँट धान खेतीका उर्वर क्षेत्र हुन । यहाँ तराईंका फाँटमा झैं धान उत्पादन हुने गर्दछ । यसैगरी, दहथुम, स्वरेक, खिलुङ, पुतलीबजार नगरपालिका वालिङ नगरपालिका, चापाकोट, रत्नपुर, मल्यांकोट, चिन्नेवास, सेतीदोभान, बिर्घा, अर्जुनचौपारी, राङभाङ, तुलसीभन्ज्याङ, जगतभन्ज्याङ, गल्याङ धान प्रमुख उत्पादक क्षेत्र हुन ।