मिर्मी,७ असार-कालीगण्डकी गाउँपालिकाको गाउँसभा १३ औं अधिवेशन अन्तर्गत आगामी आर्थिक वर्षको नीति तथा कार्यक्रम सार्वजनिक गरिएको छ ।
पालिकाले बिहीबार आगामी आर्थिक वर्ष २०८०/०८१ को नीति तथा कार्यक्रम सार्वजनिक गरेको हो ।
पालिकाका अध्यक्ष खिमबहादुर थापाले पालिकाको सामाजिक विकाससँग सम्बन्धित ९ वटा शिर्षकमा बुँदागत प्रतिवद्धतासहित आगामी आर्थिक वर्षको नीति तथा कार्यक्रम सार्वजनिक गर्नुभएको छ ।

पालिकाको नीति तथा कार्यक्रममा स्वास्थ्य, शिक्षा, युुवा तथा खेलकुद, लैंगिक समानता तथा सामाजिक समावेशिकरणसहित ९ वटा शिर्षकमा वुँदागतरुपमा नीति तथा कार्यक्रम सार्वजनिक गरिएको छ ।

आर्थिक विकास सम्बन्धी नीति तथा कार्यक्रममा समृद्ध गाउँपालिकाको निर्माणका लागि सार्वजनिक, निजी, र सहकारी क्षेत्रको भूमिकालाई प्रभावकारी बनाउने, नवप्रवर्तन र उद्यमशीलता प्रवद्र्धनका विषयलाई प्राथमिकतामा पारिएको छ । यस्तै उद्योग तथा पर्यटन सम्बन्धी विभिन्न जातजातिहरुको ऐतिहासिक, सांस्कृतिक, धार्मिक पहिचानलाई महत्व दिइएको छ । शीत भण्डार र कृषि बजार कार्यक्रमलाई अगाडि ल्याइने आगामी नीति तथा कार्यक्रममा समेटिएको छ ।

यसैगरी भौतिक पूर्वाधारमा आगामी आर्थिक वर्ष १५ किलोमिटर सडक कालोपत्रे तथा ढलान गर्ने नीति तथा कार्यक्रममा अध्यक्ष थापाले उल्लेख गर्नुभएको छ । रोजगार सम्बन्धी वैदेशिक रोजगारबाट फर्केका युवाहरुलाई स्वदेशमै सीप र क्षमताका आधारमा आयमूलक कार्यमा प्रेरित गरिने उल्लेख गरिएको छ ।
नीति तथा कार्यक्रम सार्वजनिक गरेसँगै आगामी अर्थिक वर्षको बजेट असार १० गते प्रस्तुत गरिने अध्यक्ष थापाले जानकारी गराउनुभयो ।