वालिङ,२५ वैशाख- वैदेशिक रोजगारीमा जान चाहने व्यक्तिहरूले स्थानीय तहबाटबाटै श्रम स्वीकृती तथा पुनः श्रम स्वीकृती सम्बन्धि सेवा प्रवाह हुने व्यवस्था भए सँगै स्थानीय तहहरूले श्रम स्वीकृती दिन थालेकाछन् ।
अबदेखि सेवाग्रहिहरुले वालिङ नगरपालिकाबाटै श्रम स्वीकृती प्राप्त गर्ने भएकाछन् । सोमबार वालिङ नगरपालिकाका नगर प्रमुख कृष्ण खाँणले वालिङ नगरपालिका १३ का सुरज श्रेष्ठ पुन लाई श्रम स्वीकृती प्रदान गरेर सेवाको शुभारम्भ गर्नुभएको हो ।
वैदेशिक रोजगारीमा साउदी अरब जान लागेका श्रेष्ठलाई पालिकाबाटै पहिलो श्रम स्वीकृती सेवा प्रदान गरिएको रोजगार संयोजक पवन वस्यालले जानकारी दिनुभयो ।
यस अघि श्रम स्वीकृती लिनको लागि वैदेशिक रोजगार विभाग वा प्रदेश स्थित श्रम कार्यालय जानुपर्ने बाध्यता थियो । तर श्रम स्विकृतीका लागि अनलाइन प्रणालीको सुरूवात भए संगै स्थानीय तहबाट यसै वर्षको वैशाख १ गतेदेखि सो सुविधा प्राप्त हुन थालेको हो।

श्रम स्वीकृती लिनको लागि राहदानी, एक प्रती पासपोर्ट साइजको फोटो, पारिवारिक विवरण, बैंक खाता, व्यक्तिगत इमेल आइडी र सम्पर्क नम्बर, रोजगारदाताले दिएको सम्झौता पत्र, भिजाको प्रतिलिपी सहित स्थानीय तहको रोजगार सेवा केन्द्र निशुल्क अनलाइन आवेदन दिन सकिने रोजगार संयोजक वस्यालले जानकारी दिनुभयो ।
वैदेशिक रोजगार कल्याणकारी कोष, सामाजिक सुरक्षा कोष र बीमा रकम बापत तिर्नुपर्ने शुल्क तोकिएको बैंक खातामा दाखिला गरेपछि श्रम स्वीकृतीको प्रक्रिया अगाडि बढ्ने र श्रम स्वीकृती पत्र अनलाइनबाटै प्राप्त गर्नसकिन्छ । आवेदन स्वीकृत भएको वा आवश्यक विवरणहरू अपुग भएको जानकारी पनि अनलाइन मार्फत नै सम्बन्धित सेवाग्रहिले प्राप्त गर्न सक्छ्न् । श्रम स्वीकृती सम्बन्धमा थप जानकारी स्थानीय तहको रोजागार सेवाकेन्द्रबाट समेत लिन सकिने ब्यवस्था मिलाइएको छ ।