वालिङ,६ भदाै- वालिङ साना किसान कृषि सहकारी संस्थाकाे सातौं वार्षिक साधारणसभा सम्पन्न भएकाे छ । अधिकाशं सहकारीहरुले कात्तिक लागेपछि मात्रै वार्षिक साधारणसभा गर्दै आएकाेमा छन् वालिङमा रहेकाे साना किसान कृषि सहकारीले वार्षिक साधारणसभा भदौं पहिलो सातामै सम्पन्न गरेको छ । हरेक संस्थाको वार्षिक साधारणसभाले संस्थागत गतिविधिलाई चुस्त दुरुस्त र सबल बनाउनका लागि महत्वपूर्ण भूमिका खेलेको हुन्छ । सोही अनुरुप वालिङ साना किसान कृषि सहकारीले समयमै वार्षिक साधारणसभा सम्पन्न गरेर सदस्यहरुको भावना अनुरुप अझ सबल र सक्षम बन्ने प्रयास गरेको छ ।

साधारणसभामा बाेल्दै वालिङ नगरपालिकाका उपप्रमुख कविता तिवारीले एक व्यक्ति एक सहकारीको नीति अनुसार चल्न सकेमा संस्था सबल र सक्षम बन्ने बताउनुभयो । आँफू पनि सहकारीकै क्षेत्रबाट नेतृत्व गर्दै नगरपालिकाको उपप्रमुख हुने अवसर प्राप्त गरेको बताउनुभयाे।

कार्यक्रममा संस्थाका अध्यक्ष सीता पाण्डेले वार्षिक प्रतिवेदन प्रस्तुत गर्नुभएको थियो । अध्यक्ष पाण्डेले कूल १ हजार ३ सय १६ जना शेयर सदस्य रहेको संस्थामा १ सय ४९ समूह रहेको जानकारी दिनुभयाे । उहाँले शेयर सदस्यहरुको सल्लाह र सुझाव अनुसार सातौं वार्षिक साधारणसभाको आयोजना गरिएको बताउनुभयाे।

अध्यक्षद्वारा प्रस्तुत प्रतिवेदन अनुसार रु.६४ लाख ५ हजार शेयर पूँजी रहेको सहकारीको रु.२ करोड १६ लाख ६८ हजार ९ सय ८७ निक्षेप रहेको छ । निक्षेपको आधारमा २९ प्रतिशत तरलता रहेको छ ।

रु.१ लाख ४३ हजार शेयर लगानी गरेको र रु.२ करोड २३ लाख ९४ हजार २ सय ४ कर्जा लिएको हिसाव रहेको छ । साधारण जगेडा कोषमा रु.२६ लाख ६९ हजार १ सय ६९ रहेको र अन्य कोषहरुमा रु.३४ लाख २२ हजार २ सय १६ रहेको अध्यक्ष पाण्डेको प्रतिवेदनमा उल्लेख गरिएको छ । यसैगरी रु.३ करोड १३ लाख ६० हजार ७ सय ९० लगानी गरेको सहकारीले रु. ३ करोड १४ लाख २७ हजार २ सय ७ कर्जा अशुली गरेको छ । रु. ६२ लाख ९५ हजार ८ सय ९४ कूल आम्दानी गरेको सहकारीले कूल खर्च रु.६१ लख ७७ हजार ६३ रुपैयाँ हुँदा रु.१ लाख १८ हजार ८ सय ३४ खुद मुनाफा गरेको छ ।

कार्यक्षेत्रका शतप्रतिशत घरधुरीलाई सदस्य विस्तार गर्ने, गैर सदस्यको पहिचान गरी सदस्य बनाउने खालका कार्यक्रम सञ्चालन गर्ने, अशुली दरलाई शतप्रतिशत बनाउन योजनावद्ध तरिकाबाट लाग्ने, पशुबीमा सञ्चालन गर्ने र उत्कृष्ट किसान तथा फर्महरुलाई सम्मान गर्नेलगायतका भावी कार्यक्रमहरु रहेकाे संस्थाले जनाएकाे छ।