गोपाल जिटी

वालिङ,२ फागुन-“हाम्रो शान, हाम्रो मान, सुन्दर नगर हाम्रो पहिचान” भन्ने मूल नारासमिहत स्याङ्जाको चापाकोटमा दोस्रो चापाकोट महोत्सव २०८० हुँदैछ । चापाकोट उद्योग वाणिज्य संघले आयोजना गर्ने महोत्सवको उद्घाटन नेपाल सरकारका कानून न्याय तथा संसदीय मामिला मन्त्री धनराज गुरुङले गर्नुहुने भएको छ । 

यही फागुन ३ देखि १३ गतेसम्म चापाकोट ९ को गङ्गालान मावि खेलमैदानमा सञ्चालन हुने महोत्सवको नेपाल सरकारका कानून न्याय तथा संसदीय मामिला मन्त्री गुरुङले उद्घाटन गर्ने आयोजक चापाकोट उद्याेग वाणिज्य संघका अध्यक्ष निर्मल रानाले जानकारी दिनुभयो ।

२०७५ सालमा पहिलो महोत्सव आयोजना गरेको संघले ५ वर्षपछि दोस्रो महोत्सव सञ्चालन गर्न लागेकाे हो । कोरोना महामारी तथा आर्थिक शिथिलतालगायतका कारण मेला महोत्सव गर्ने वातावरण बनेको थिएन, समय अनुकुलतालाई हेरेर अहिले दोस्रो संस्करणको महोत्सव सञ्चालन गर्न लागिएको अध्यक्ष रानाले बताउनुभयो । 

महोत्सवमा कृषिजन्य उत्पादन, हस्तकला सामग्री, सूचना प्रविधि, बाल उद्यान, शैक्षिक प्रदर्शनी एवम् फेन्सी आइटमका पसलहरु रहने छन् । यसकासाथै विविध प्रतियोगितात्मक कार्यक्रमहरुकोसाथमा राष्ट्रिय कलाकारहरुको दैनिक प्रस्तुति हेर्न पाइने महोत्सवका सूचना तथा सञ्चार उप समितिका संयोजक गोपीकृष्ण रेग्मीले बताउनुभयो ।

विविध प्रतियोगितात्मक कार्यक्रमहरुमा लोक भजनगीत, रत्यौलीगीत, वक्तृत्वकला, चापाकोट डान्स आइडललगायतका प्रतियोगिताहरु हुनेछन् भने साथमा विद्यालय स्तरीय नृत्य प्रदर्शन रहने छ । यसकासाथै कालिगण्डकीमा ¥याफ्टिङ सञ्चालन, हेलिकप्टर उडान र प्याराग्लाइडिङमार्फत पुष्पवृष्टि गरिने छ ।

यही फागुन १३ गतेसम्म सञ्चालन हुने महोत्सवको तयारी अन्तिम चरणमा पुगेकोसमेत महोत्सव अनुगमन तथा मूल्याङ्कन उपसमितिका संयोजक मिरा अर्यालले बताउनुभयो ।