वालिङ,११असोज-वालिङमा मुख्य कार्यालय रहेको उपकार बचत तथा ऋण सहकारी संस्था लिमिटेडले पूर्व नेतृत्व क्षमता अभिवृद्धि तालीम सम्पन्न गरेको छ ।
सहकारीले यही असोज ३० गते हुने नवौं अधिवेशन लक्षित पूर्व नेतृत्व क्षमता अभिवृद्धि सम्बन्धी दुई दिने तालीम सञ्चालन गरेको हो ।
संस्थाको मुख्य कार्यालयको हलमा सञ्चालित तालीममा ६४ जनाको सहभागीता रहेको थियो ।
सहभागीहरुलाई प्रमाणपत्र वितरण गर्दै सहकारीका कार्यबाहक अध्यक्ष लक्ष्मीपति पौडेलले संस्थाको सञ्चालक समिति र लेखा तथा सुपरिवेक्षण समितिमा उमेदवार बन्नका लागि पूर्व नेतृत्व क्षमता अभिवृद्धि तालीम अनिवार्य लिएको हुनुपर्ने व्यवस्था भए बमोजिम तालीम सञ्चालन गरिएको बताउनुभयो ।
तालीमको सहजिकरण सहकारीहरुको छाता संगठन नेपाल बचत तथा ऋण केन्द्रीय सहकारी संघ लिमिटेड ( नेफ्स्कुन ) का प्रशिक्षक सूर्यप्रसाद तिमिल्सिनाले गर्नुभएको थियो ।
२०५० सालमा स्थापना भएको सहकारीको ३१ औं वार्षिक साधारणसभा तथा नवौं अधिवेशन असोज २९ र ३० गते हुने भएको छ ।
साधारणतया सहकारी संस्थाहरुले पुस महिनामा साधारणसभा गर्ने परिपार्टी रहेका बेला उपकारले भने असोजमै गर्ने भएको हो । आगामी मंसिर ७ गतेसम्म वर्तमान सञ्चालक समितिको कार्यकाल रहेपनि २ महिना अगावै अधिवेशन मार्फत नयाँ नेतृत्व निर्वाचित गर्ने तयारीमा सहकारी लागेको हो ।