वालिङ,४ भदौ- वालिङ नगरपालिकामा सञ्चालनमा रहेका सवारीसाधनहरुको पार्किङ तथा भाडादर कायम गरिएको छ ।
नगरप्रमुख कृष्ण खाँणको अध्यक्षतामा सोमबार बसेको बैठकले नगरको बजार क्षेत्रमा सवारीसाधनको पार्किङका साथै भाडा दर समेत निर्धारण गरेको हो । बैठकमा ट्राफिक प्रहरी,जीप तथा अटो ब्यवसायी र उद्योग वाणिज्य संघका प्रतिनिधिको सहभागितामा बसेको बैठकले वालिङमा सञ्चालित सवारीसाधनहरुको ब्यवस्थापनको लागि विभिन्न निणर्यहरु गरेको छ ।
बैठकले वालिङ नगरपालिकाभित्र सञ्चालनमा रहेका सवारीसाधनहरु बजार क्षेत्रमा एकतर्फी आलोपालो पार्किङ गर्ने निणर्य गरेको छ ।
त्यसैगरी बैठकले वालिङमा सञ्चालित अटो रिक्साको भाडा दर समेत निर्धारण गरेको छ । अटो रिक्साको भाडा कच्ची सडकमा तीन किलो मिटर सम्म प्रतिव्यक्ति प्र्रति किलो मिटर १५ रुपैँया कायम गरिएको छ भने पक्की सडकमा तीन किलो मिटर सम्म प्रति व्यक्ति प्रति किलो मिटर १० रुपैँया कायम गरिएको छ ।
यसै गरी स्याङ्जा पर्वत प्रा.लि.बाट सञ्चालित जीपहरु भुम्रे चोकदेखि माथि कृषि विकास बैङ्कको पछाडिको खाली जग्गामा पार्किङ गर्ने निणर्य गरिएको नगरपालिकाले जनाएको छ ।