तस्विरः गण्डकी समाचार

गोपाल जिटी
वालिङ, १ साउन- स्याङ्जाको विकट भनेर चिनिने हरिनास गाउँपालिकाको कार्यालय रहेको चुलीडाँडा अहिले कालोपत्रेसहितको सडक सञ्जालले घेरिएको छ । चुलिडाँडाको स्वच्छ, सुन्दर र मनोरम स्थलले त्यहाँ पुग्ने जो कोहीलाई पनि आनन्दित पार्दछ ।
पालिकाको कार्यालय रहेको चुलीडाँडा वरिपरी कालोपत्रेसहितको सडक सञ्जालको विस्तारसँगै सिंगो हरिनासकै मुहार फेरिएको छ ।
जिल्लाको पूर्वी भेगमा अधिकांश पहाडी भूभाग रहेको हरिनास गाउँपालिका सडक विस्तारसँगै यातायातका हिसावले सहज बन्दै छ ।

देशको राजनीतिक परिवर्तनको प्रभाव चित्रे भञ्ज्याङमा देख्न सकिन्छ । जिल्ला सदरमुकाम पुतलीबजारबाट दिनभरीको पैदलयात्रा गरेर मुश्किलले भेड्किइने हरिनास अहिले सहजै पुग्न सकिने भएको छ । जिल्लाको मध्येभागमा रहेको वालिङबाट समेत उत्ति नै समय लाग्ने गर्दथ्यो । यी दुबै स्थानबाट मोटर साइकल या गाडीद्वारा डेड घण्टामै पुग्न सकिने भएको छ हरिनासको चुलिडाँडा ।
पालिकाको कार्यालय जोड्नेगरी विभिन्न स्थानबाट सडक कालोपत्रेको कामले गति लिएको छ । यो आर्थिक वर्षभित्र ५६ किलोमिटर सडक कालोपत्रे हुने गाउँपालिकाका अध्यक्ष खिमनारायण मानन्धरले जानकारी गराउनुभयो । अध्यक्ष मानन्धरका अनुसार विभिन्न स्थानका गरी कूल १ अर्ब ७४ करोडमा सडक कालोपत्रेको काम हुने भएको हो ।
संघीय तथा प्रदेश सरकारको बजेटमा पालिकाका ५ स्थानबाट कालोपत्रेको काम गरिएको छ । अघिल्लो सरकार भएकाबेला विशेषगरी संघीय सरकारका मन्त्री पद्मा अर्याल र गण्डकी प्रदेश तत्कालिन प्रदेश सभासदस्य मिनप्रसाद गुरुङको पहलमा बजेट विनियोजन भई काम अगाडि बढेको पालिकाका अध्यक्ष मानन्धरले बताउनुभयो ।

संघीय सरकारले गाउँपालिकालाई कालेपत्रेले जोड्ने कार्यक्रम अन्तर्गत राते पहाडदेखि चित्रे हुँदै गृहकोटसम्म काम सम्पन्न भएको छ । यो सडकमा १० किलोमिटर कालोपत्रेको लागि ३० करोडमा टेण्डर गरिएको थियो ।
यसैगरी तनहुँको साँखेखोलामा पुलसहित चिसापानी हुँदै गाउँपालिकाको केन्द्र चुलीडाँडासम्म कालोपत्रेको काम अन्तिम चरणमा पुगेको छ । यो सडक प्रदेश सरकारको ६२ करोडको लागतमा गरिएको हो । पक्की पुलसहित १६ किलोमिटर सडक कालोपत्रे गरिएको छ ।
यस्तै एक प्रदेश एक बाटो अन्तर्गत घुम्ती चिसापानीहुँदै चित्रे सडकको काम पनि अन्तिम चरणमा रहेको छ । काउले खुदी सालडाँडा खण्डको ९ किलोमिटर सडक ४० करोडको लागतमा कालोपत्रे गरिएको छ ।
भिमादको बाघटारदेखि राङरुङ हुँदै राम्चेसम्म १६ किलोमिटर सडक २९ करोडको लागतमा प्राधिकरणको बजेटमा गरिएको हो ।
गाउँपालिकाले टेण्डर गरेको क्याक्मीदेखि कोइरालेहुँदै दोभानसम्म ५ किलोमिटर कालोपत्रे गरिएको छ । यो सडक करिव १३ करोडमा ठेक्का भई काम गरिएको हो ।
बाँकी ग्रामिण सडकहरुलाई पनि नाली र ग्राभेलसहित व्यवस्थित गर्ने काममा पालिका लागेको अध्यक्ष मानन्धरले बताउनुभयो ।