गल्याङ,९ असार- गल्याङ नगरपालिकाले किसानलाई कृषि उपकरण वितरण गरेको छ । नगरभित्र रहेका किसानहरुलाई कृषि उपकरण वितरण गरिएको हो ।

कृषि औजारको वितरण कार्यक्रममा बोल्दै नगरप्रमुख गुरुप्रसाद भट्टराई नगरपालिका द्वारा वितरण गरिएका आधुनिक

किसिमका कृषि औजारको सहि सदुपयोग गरेर आफ्नो उत्पादनलाई बृद्धि गर्न आग्रह गर्नुभयो । नगरपालिकाबाट वितरण गरिएका औजारहरुको नाफामुखी भन्दा पनि सहयोगी भावनाले सबै किसानहरुको आवश्क्ता अनुसार प्रयोग गरेर आफ्नो उत्पादन बढाउने कार्यमा लाग्नुपर्नेमा नगरप्रमुख भट्टराईले जोड दिनुभयो ।

कृषकलाई प्रोत्साहन गर्ने खालका कार्यक्रमहरु सञ्चालन गर्ने र गल्याङ नगरपालिकालाई कृषिमा आत्मनिर्भर बनाउने अभियानमा आफू र नगरपालिका लागेको नगरप्रमुख भट्टराईको भनाइ थियो ।
कार्यक्रममा नगरपालिकाका उपप्रमुख हेमा न्यौपाने, प्रमुख प्रशासकीय अधिकृत दामोदर शर्मा लगायतले मेसिनको सहि सदुपयोग गरि कृषि कर्मलाई सहज बनाउन समेत आग्रह गर्नुभएको थियो । हातेट्रयाक्टर ७० वटा, कुटानीपिसानी मेसिन ४० वटा र ब्रसर मेसिन (घाँस काट्ने मेसिन) ६ थान ५० प्रतिस अनुदानमा उपलब्ध गराइएको कृषि शाखा प्रमुख शिव ढकालले जानकारी दिनुभयो ।