वालिङ,३ असार- वालिङमा बजार अनुगमन गरिएको छ । नगरपालिकामा रहेको मुख्य बजारको आइतबार अनुगमन गरिएको हो ।
नगरपालिकाको वडा नम्बर ८,९ र १० को मुख्य बजार क्षेत्रमा नगर उपप्रमुख कविता तिवारीको संयोजकत्वमा इलाका प्रशासन कार्यालय, वडा प्रहरी कार्यालय वालिङ, सशस्त्र प्रहरी बल ३० नंं गुल्म लगायतको सहभागितामा बजारको अनुगमन गरिएको हो ।
वालिङको मुख्य बजार क्षेत्रमा रहेका पसलहरुले सडक पेटीमा राखेका सामानहरुलाई व्यवस्थित रुपमा राख्न अनुगमन गरिएको नगरपालिकाले जनाएको छ ।
बजारको अनुगमन गर्ने क्रममा नगर उपप्रमुख तिवारीले बजारको सौन्दर्यता बचाइराख्न सबैको सहयोग आवश्यक रहेको बताउनुभयो । उहाँले व्यापारिक प्रयोजनको लागि राखिएका सामग्रीहरुको उचित व्यवस्थापन हुन नसक्दा बजार अव्यवस्थित बन्नुका साथै सौन्दर्यतामा कमी भएको गुनासो आएकोले नगरले योजना अनुरुप नै अनुमगन गरेको बताउनुभयो ।
उपप्रमुख तिवारीले पसलको सटर भन्दा वाहिर सामान राख्दा पैदल यात्रुलाई असहज हुनुका साथै सवारी आवागमनमा समस्या हुनेहुदा अव्यवस्थित रुपमा सामान नराख्न अनुरोध गर्नु भयो ।
अनुगमनको पहिलो चरणमा प्रत्येक पसलहरुमा पुगी व्यापारीहरुलाई सचेत गराईएको नगरपालिकाले जनाएको छ ।
अनुगमनको क्रममा नगरपालिकाले जारी गरेको बजार व्यवस्थापन सम्बन्धी सुचना अवज्ञा गरेको पाइएमा २० प्रतिशत जरिवाना गरिने तथा पटक पटक अवज्ञा गरिएको पाइएमा समान जफत गरिने पनि नगरपालिकाले जनाएको छ ।