गोपाल जिटी
वालिङ,२३ जेठ- माध्यमिक तहसम्मको पठनपाठन निःशुल्क भएपनि उच्च शिक्षाका लागि भने निःशुल्क हुनसकेको छैन । तर स्याङ्जा वालिङको एक क्याम्पसले निःशुल्क शिक्षा दिले अभियानमा आगाडि बढेको छ ।

वालिङ नगरपालिका ७ केवरेस्थित बालसिद्ध क्याम्पसमा अध्ययनरत विद्यार्थीहरुलाई निःशुल्क शिक्षा लिने अवसर प्राप्त गर्दै आएकाछन् । बालसिद्ध क्याम्पसले विगत १३ वर्षदेखि स्नातक तहमा अध्ययनरत विद्यार्थीहरुलाई बिना शुल्क क्याम्पसको पठनपाठन सञ्चालन गर्दै आएको छ ।

करिव सयको हाराहारीमा विद्यार्थीहरु अध्ययनरत रहेको यस क्याम्पसमा शिक्षा संकाय अन्तर्गत नेपाली, अङ्ग्रेजी, अर्थशास्त्र र जनसङ्ख्या विषयको पढाई हुदैआएको छ । २०६५ सालदेखि सञ्चालनमा ल्याइएको बालसिद्धमा सुरुका दुई वर्ष केही शुल्क लिइएको थियो । उच्च शिक्षा पनि निःशुल्क प्राप्त गर्न पाउनुपर्छ भन्ने मान्यताले विना शुल्क अगाडि बढाइएको क्याम्पस प्रमुख ताराप्रसाद रेग्मीले बताउनुभयो ।
सबैभन्दा ठूलो कुरो शिक्षा रहेछ, शिक्षाले नै मानिसलाई सक्षम बनाउदो रहेछ । सक्षम नागरिकले आफ्नो जिविकोपार्जनलाई सक्षम बनाउदो रहेछ भन्ने आधारलाई मनन गरेर क्याम्पस सञ्चालनको सोंच बनाएको क्याम्पस प्रमुख रेग्मीले बताउनुभयो ।
विशेषगरी आर्थिक अवस्था कम्जोेर भएका बालबालिकालाई उच्च शिक्षा प्रदान गर्न सकियोस भन्ने हेतुले क्याम्पस सञ्चालनमा ल्याइएको रेग्मीले उल्लेख गर्नुभयो ।

सबैले उच्च शिक्षा हाँसिल गर्न आवस्यक छ र मात्रै देशले खोजेको समृद्धिको ढोका खुल्छ । यसका लागि स्थानीय स्तरमै सहज र गुणस्तरीय शिक्षा आजको आवस्यकता हो भन्ने आँफुहरुको मान्यता रहेको क्याम्पस प्रमुख रेग्मीको भनाई छ ।
अन्य स्थानमा के छ, सुन्नमा आएको छैन, चुनौतिका बावजुद पनि विना शुल्क क्याम्पस सञ्चालन गरिएको छ । इच्छाशक्ति हुने हो भने सम्भव छ भन्ने आँफूहरुको अभ्यासले देखाएको उहाँको भनाई छ ।