काठमाडौँ,२ असोज– नेकपा (एमाले) निकट विद्यार्थी सङ्गठन अनेरास्ववियुको अध्यक्षमा सुनिता बराल चयन हुनुभएको छ । ललितपुर स्थित तुलसीलाल स्मृति प्रतिष्ठानमा भएको केन्द्रीय सचिवालय बैठकले केन्द्रीय कमिटीलाई पुनःगठन गर्दै बराललाई अध्यक्षमा निर्वाचित गरेको हो ।

निवर्तमान अध्यक्ष ऐन महरले बैठकमा राजीनामा दिएपछि बरालको अध्यक्षतामा ४ सय ६ सदस्यीय केन्द्रीय कमिटी पुनःगठन गरेको अनेरास्ववियुले जनाएको छ । पुनःगठित केन्द्रीय कमिटीले आगामी अखिलको २३औँ महाधिवेशन गराउने छ।

नवनिर्वाचित अध्यक्ष बराल अखिलको केन्द्रीय सदस्य, सचिवालय सदस्य, सचिव र उपाध्यक्ष भइसक्नुभएको छ । उहाँ अखिलमा महिलाबाट अध्यक्ष बन्ने तेस्रो हुनुहुन्छ । यस अघि रामकुमारी झाँक्री र नवीना लामा अखिलको अध्यक्ष भइसक्नुभएको छ।

सङ्गठनको वरिष्ठ उपाध्यक्षमा आरसी लामिछाने र महासचिवमा समिक बडालले जिम्मेवारी पाउनुभएको छ भने सचिवमा स्याङ्जाका सुजन भट्टराई चयन हुनुभएको छ । उहाँले गण्डकी प्रदेशको इन्चार्जको समेत जिम्मेवारी प्राप्त गर्नुभएको छ । कालीगण्डकी गाउँपालिका स्थायी घर भएका भट्टराई लामो समयदेखि विद्यार्थी राजनीतिमा सकृय हुनुहुन्छ । निवर्तमान अध्यक्ष ऐन महर, उपाध्यक्ष रश्मी आचार्य, महेश बर्तौला र शैलेश लामाले अखिलबाट बिदा लिनुभएको छ।