गल्याङ,१७ जेठ– गल्याङ बजारमा कोरोना भाइरस (कोभिड १९) को परीक्षण गरिएको छ । बजार क्षेत्रमा संक्रमण फैलीन सक्ने आकलन गर्दै नगरपालिकाले आज गल्याङको बजार क्षेत्रमा संक्रमणको अवस्था पत्ता लगाउन एन्टिजिन परीक्षण गरेको हो । बजार क्षेत्रमा बसोबास गर्दै आएका ३७ जनामा गरिएको परीक्षणमा १ जनामा संक्रमण पोजेटिभ आएको छ भने अन्य ३६ जनामा संक्रमण नदेखिएको नगरालिकाले जनाएको छ ।

नगरपालिका स्वास्थ्य शाखा संयोजक गुनेन्द्र राना, गल्याङ नगर अस्पतालका चिकित्सक निरञ्जन चौधरी सहितको टोलीले एण्टिजिन परीक्षण गरेको हो । वडा नम्बर तीनका अध्यक्ष महेश भट्टराईले बजार क्षेत्रमा घर घर पुगेर नगरबासिहरुलाई निशुल्क परीक्षण गर्ने कार्यक्रममा सहभागी हुन आग्रह गरिएको बताउनुभयोे । वडाध्यक्ष भट्टराईले निशुल्क परीक्षण गराउदा समेत बजार क्षेत्रका केहीले मानिसले परीक्षण गर्न नचाहेको समेत बताउनुभयो ।

नगरपालिकाम कोरोनाको संक्रमितको संख्यामा केही कमि आएको स्वास्थ्य शाखा संयोजक गुनेन्द्र रानाले जानकारी दिनुभयो । संक्रमणको दरमा केही कमि भए पनि सावधानी अपनाउन र स्वास्थ्य मापदण्डको पालना गर्न भने छाड्न नहुने उहाँले बताउनुभयो । कोरोनाको नयाँ नयाँ भेरियन्ट आउने क्रम चलिरहेको र सुस्त गतिमा भए पनि संक्रमण फैलने क्रम रहेकाले अझै पनि उच्च सावधानी अपनाउनुपर्ने राना बताउनुहुन्छ । आवश्यकताको आधारमा अन्य ठाउँहरुमा पनि पुगेर परीक्षण गरिने जनाउदै नगरपालिकाले महामारी नियन्त्रणका लागि स्वास्थ्य परीक्षण गर्नु पर्ने बताउदै लक्ष्यण देखिएका र संकालागेका नगरवासिहरुले नगरपालिकाले तोकेका ठाउँहरुमा निशुल्क परीक्षण गराई सहयोग गर्न समेत सबैमा आह्वान गरेको छ ।
नगरपालिकाले निशुल्क परीक्षणको व्यवस्था मिलाएपनि लक्ष्यण देखिएकाले समेत परीक्षण गर्न भने रुची नदेखाएको पाइएको छ ।
नगरपालिकाले पोजेटिभ देखिएकाहरुलाई औषधी उपचारको व्यवस्था र गम्भिर विरामीका लागि अस्पताल ल्याउने व्यवस्था पनि मिलाएको जनाएको छ । नगरपालिका संग सबै ठाउँमा परीक्षण गर्न माग गर्ने तर आफुले परीक्षण गर्न नचाहाने प्रवृत्ति देखिएको छ ।