वालिङ,३१ वैशाख– गह्रौ प्राथमिक अस्पतालमा अक्सिजन सहितको आइसोलेसन सञ्चालनमा आएको छ । वालिङ नगरपालिकाले निर्माण गरेको ३५ शैयाको अक्सिजनसहितको आइसोलेसन केन्द्र बिहीबार साँझदेखि सञ्चालनमा आएको छ ।

नगर प्रमुख दिलीपप्रताप खाँणले गह्रौ प्राथमिक अस्पतालको निर्माणाधिन भवनमा अक्सिजन सहितको आइसोलेसन कक्ष सञ्चालनमा ल्याइएको बताउनुभयो । आइसोलेसन कक्षमा रहेका प्रत्येक शैयामा अक्सिजन सिलिण्डर तथा अक्सिजन कन्सन्ट्रेटर जडान गरी उपचार गरिने नगरप्रमुख खाँणले बताउनुभयो ।

कोभिडको दोस्रो लहरका सङ्क्रमितहरुमध्ये केहीलाई स्वास प्रस्वासमा समस्या देखिने गरेकाले उहाँहरुको अवस्था हेरी अक्सिजन दिएर उपचार गरिने र धेरै नै समस्या देखिएमा वा भेन्टिलेटरमा राखेर उपचार गर्नुपर्र्ने अवस्था आएमा थप उपचारका लागि लगिने नगर प्रमुख खाँणले बताउनुभयो ।

जिल्लाका ११ पालिकाहरु मध्ये अन्य पालिकाको तुलनामा वालिङमा कोरोना संक्रमितको संख्या बढि रहेको छ । सङ्क्रमितहरुलाई दैनिक मनोसामाजिक परामर्श दिनुका साथै घर–घरमै लगेर औषधिहरु उपलब्ध गराउँदै आएको वालिङ नगरपालिकाका स्वास्थ्य शाखा प्रमुख कमलप्रसाद पाण्डेले बताउनुभयो ।