वालिङक,२६ वैशाख– स्याङ्जाका थप ३ कोरोना संक्रमितको मृत्यु भएको छ । पछिल्लो समय कोरोनाको दोस्रो भेरियन्ट तिव्र गतिमा फैलिएको छ । जसका कारण संक्रमितको संख्यामा समेत बृद्धि भएको छ भने दैनिक यहाँका संक्रमितहरुको मृत्यु हुने गरेको छ ।
जिल्लाका दुई महिला र एक पुरुष गरी थप ३ जना संक्रमितको मृत्यु भएको जिल्ला स्वास्थ्य कार्यालयका निमित्त प्रमुख विष्णुप्रसाद सुवेदीले बताउनुभयो ।
वालिङका दुई महिला र भीरकोटका एक पुरुष गरी ३ जनाको मृत्यु भएको सुवेदीले बताउनुभयो । वालिङकी ६६ वर्षीय महिलाको पोखराको चरक हस्पिटलमा मृत्यु भएको हो भने भीरकोट १ का ६८ वर्षीय पुरुषको पोखरा स्वास्थ्य विज्ञान प्रतिष्ठानमा मृत्यु भएको हो त्यस्तै वालिङ १३ की ७७ वर्षीय महिलाको होटल आईशोलेसनमा मृत्यु भएको हो । मंगलबार मृत्यु भएकी वालिङकी एक महिलाको भने आँधीखोला किनारमा नेपाली सेनाले सव व्यवस्थापन गरेका छन् ।
यसैबीच मंगलबार स्याङ्जामा ९४ जना कोरोना संक्रमित थपिएका छन् । मंगलबार थपिएका सहित जिल्लामा सक्रिय संक्रमितको संख्या ५९१ पुगेको स्वास्थ्य प्रमुख सुवेदीले बताउनुभयो । पिसिआर परिक्षणबाट ७८ जना संक्रमित पुष्टी भएका हुन भने १८ जना एन्टिजिन परिक्षणबाट पुष्टी भएका हुन् । संक्रमित मध्ये ५१८ जना होम आईशोलेसनमा छन् भने ३१ जना संक्रमित क्वारेन्टीन, ४२ जना विभिन्न स्वास्थ्य संस्थामा सामान्य उपचाररत छन् ।