स्याङ्जा, २४, वैशाख– कोरोना भाइरस (कोभिड १९) को दोस्रो चरणको संक्रमण बढ्दै जान थालेपछि यसको रोकथाम र नियन्त्रण गर्ने योजना अनुसार आँधीखोला गाउँपालिकाले कोभिड अस्पताल सञ्चालनमा ल्याएको छ ।
गाउँपालिका अध्यक्ष सुधिर कुमार पौडेलले बढ्दै गएको कोरोना संक्रमणलाई फैलीन नदिन र सहज रुपमा स्वास्थ्य सेवा प्रदान गर्न गाउँपालिकाले कोभिड अस्पताल सञ्चालनमा ल्याएको बताउनुभयो ।

गाउँपालिकाले १५ बेडको आइसोलेसन वार्ड तयार गरेको छ भने ५ बेडको अक्सिजन सहितको वर्ड निर्माण गर्ने तयारीमा रहेको गाउँपालिकाका सूचना अधिकृत रोशन लामिछानेले जानकारी दिनुभयो । लामिछानेका अनुसार हाललाई ३० बेडको क्वारिन्टिन निर्माण गरिएको छ भने विदेशबाट आउनेहरुलाई घरमा असुरक्षीत महशुस गरी क्वारिन्टिनमा बस्न चाहेको अवस्थामा गाउँपालिकाले निशुल्क बस्ने खाने सहितको ब्यवस्था मिलाएको छ ।

सेती दोभानमा रहेको आँधीखोला सामुदायी अस्पताललाई पालिकाले कोभिड १९ अस्थायी अस्पतालको रुपमा सञ्चालन गर्नुका साथै कोरोना संक्रमण फैलिन नदिनको लागि सबै वडामा वडा अध्यक्षको अध्यक्षतामा निगरानी समुहको गठन गरेको छ । निगरानी समुहले पालिकाभित्र बाहिरबाट आउनेहरुको अनुगमन गर्ने, उनिहरुलाई क्वारिन्टिन व्यवस्थापनको लागि सहजिकरण गर्ने, स्थानिय स्तरमा देखिएका सम्भावित संक्रमितको परीक्षण र उपचारमा सहजिकरण गर्नेछ ।

दिर्घरोगीलाई औषधीको व्यवस्था

गाउँपालिकाले नियमित औषधी सेवन गर्नु पर्ने दिर्घरोगीहरुलाई निषेधाज्ञका कारण औषधी ल्याउन समस्या हुने भएकोले आवश्यक औषधी समेत ल्याउने ब्यवस्था समेत मिलाएको छ । अहिले अस्पतालनमा ६ जना संक्रमितहरु आइसोलेसनमा रहेका छन् र उनिहरुको स्वास्थ्य अवस्था सामान्य रहेको गाउँपालकाले जनाएको छ ।