गल्याङ,१४ जेठ– गल्याङ नगरपालिका ११ गिरनचौरमा कोरोना भाइरस (कोभिड १९) को परीक्षण गरिएको छ । उक्त क्षेत्रमा कोरोना भाइरससँग मिल्दोजुल्दो लक्षण देखिएका विरामीको संख्या बढेपछि नगरपालिकाले गाउँमै पुगेर स्थानीय बासिन्दाको एन्टिजिन परीक्षण गरेको हो । स्थानीय ६१ जनाको परीक्षण गरिएकोमा एक जनामा संक्रमण पोजेटिभ देखिएको नगरपालिका स्वास्थ्य शाखा संयोजक गुनेन्द्र रानाले जानकारी दिनुभयो ।

गल्याङ नगर अस्पतालमा मात्रै एन्टिजिन परीक्षण गरिएकोमा शुक्रबार गिरनचौरमा रहेको शहरी स्वास्थ्य इकाई (केन्द्र) मा एन्टिजिन परिक्षण गरिएको हो । उक्त क्षेत्रमा विरामीको संख्या बढेको भन्दै स्थानीयले पनि परीक्षणको माग गरेका थिए । आवश्यकताको आधारमा अन्य गाउँहरुमा पनि पुगेर परीक्षण गरिने नगरपालिका प्रमुख भुपराज अधिकारीले बताउनुभयो । गरप्रमुख अधिकारीले भन्नुभयो, ‘रोगको पहिचान गरी थप महामारी फैलिन नदिन नगरपालिकाले गाउँमा नै पुगेर परिक्षण गर्न लागेको हो ।’

नगरपालिकाका प्रमुख प्रशासकीय अधिकृत दामोदर शर्माले महामारीलाई कम गर्न नगरपालिकाले विभिन्न उपायहरु अपनाउने तयारी अन्तरगत सक्रियताका साथ काम गरिरहेको बताउनुभयो ।