वालिङ,२७ वैशाख– गल्याङ नगरपालिकाले गल्याङ ३ मा रहेको नगर अस्पतालमा ९ ओटा अक्सिजन सिलिण्डर सहितको ३० बेडको आइसोलेसन वार्ड निर्माण गरेको छ । नगरपालिकाद्वारा सञ्चालित नगर अस्पतालमा कोरोना भाइरस (कोभिड १९) का विरामीका लागि अक्सिजन सहितको आइसोलेसन वार्डको स्थापना गरिएको हो ।

अस्पतालले अहिले तीन जना चिकित्सक सहितको टोलीले विरामीलाई सेवा दिइरहेको छ । हाल अस्पतालमा कोरोना भाइरस को परीक्षण गरिए पनि नतिजा पोजिटिभ देखिएका विरामीहरु होम आइसोलेसनमा बस्दै आएका छन् । गल्याङ नगरपालिका प्रमुख भुपराज अधिकारीले अप्ठ्यारो परेका विरामीहरुका लागि आइसोलेसन वार्ड स्थापना गरिएको बताउनुभयो ।

नगरप्रमुख अधिकारीले भेण्टिलेटरको आवश्यकता पर्ने विरामीहरुका लागि अक्सिजन सहित एम्बुलेन्समा पोखरा वा बुटवल लैजानका लागि पनि व्यवस्था गरिएको बताउनुभयो । उहाँले हालसम्म कोरोना परीक्षण गरिएका व्यक्तिहरुमा समस्या नआएकाले स्वइच्छाले होम आइसोलेसनमा बसिरहेको र कुनै समस्या परेमा सम्पर्क गर्न भनिएको बताउनुभयो । होम आइसोलेसनमा बसिरहेकाहरुलाई पनि औषधी सहितका सेवाहरु दिइरहेको र चिकित्सकहरुले निरन्तर अनुगमन बताउनुभयो ।