कास्की,२६ चैत– पोखरा महानगरपालिका वडा नम्बर ८, सभागृहचोकमा बुधबार साँझ एक महिलाको हत्या भएको छ ।
सभागृहचोकमा साँझ एक युवकले महिलालाई पछाडिबाट टाउकोमा धारिलो हतियार प्रहार गरेको प्रत्यक्षदर्शीहरुले बताएका छन् ।
सहभागृहचोकको सडकपेटीमा उभीनुभएकी पोखरा–५, मालेपाटन बस्ने ४२ वर्षीया सिर्जना पौडेल केसीमाथि हतियार प्रहार भएको हो । महिलामाथि एक्कासि हतियार प्रहार गरी युवक मोटरसाइकल चढी भागेको स्थानीयले बताएका छन् ।
घाईते केसीलाई तत्काल उद्धार गरी उपचारको लागि गण्डकी मेडिकल कलेज लगिएको थियो । आस्पतालमा चिकित्सकले मृत घोषणा गरेका थिए । जिल्ला प्रहरी कार्यालय कास्कीले घटनामा संलग्नको खोजी भइरहेको जनाएको छ ।