गोपाल जिटी

वालिङ,७ मङ्सिर- वालिङमा मुख्य कार्यालय रहेको उपकार बचत तथा ऋण सहकारी संस्था जिल्लाकै अगुवा भएको राष्ट्रिय सहकारी ब्याङ्कका सञ्चालक रामबहादुर जिसीले बताउनु भएको छ । संस्थाको ३२ औं इकाई वार्षिक साधारणसभा वालिङ सेवाकेन्द्रको उद्घाटन गर्दै राष्ट्रिय सहकारी ब्याङ्क गण्डकीका संयोजकसमेत रहनुभएका जिसीले उपकार सहकारी जिल्लाकै अगुवा भएको बताउनु भएको हो ।

यो सहकारीले सहकारी अभियानलाई यहाँ ल्याउन महत्वपूर्ण भूमिका खेलेका उहाँले उल्लेख गर्नुभयो । उहाँले भन्नुभयो, “सहकारीहरुमा विमति होलान्, सहकारीका बारेमा फरक धारणा होलान् हुनसक्छन् । तर स्याङ्जाको सहकारी अभियानको सुरुवात गर्न, स्याङ्जाको सहकारी अभियानलाई टिकाउन र टेकाउन उपकार सहकारीको ठूलो योगदान छ ।” 
हिजोदेखि कहिँ न कहिं जोडिएर काम गरिरहेको र यो सहकारी स्थापना गर्ने २७ जना संस्थापकज्यूहरुसहित आज यो अवस्थासम्म ल्याउने सबैलाई धन्यवाद दिन चाहन्छु, उहाँले भन्नुभयो । यतिबेला सहकारी क्षेत्रमा निरासा छ, हामीले प्रयोग गर्ने मोवाइल पनि नकारात्मक कुराहरुको विकास भएको छ । नकारात्मक कुरा सहकारी क्षेत्रमा मात्र होइन, अरु क्षेत्रमा पनि उत्तिकै छन् । अल्लि बढि सहकारी क्षेत्रमा छन् । त्यस कारण हामीले यो बेलामा धैर्यता गुमाउनु नहुने सहकारी ब्याङ्कका सञ्चालक जिसीको भनाई छ । उत्साहित भएर अगाडि बढ्ने बेला भएको उल्लेख गर्दै जिसीले सहकारी संस्थाहरुले साधारणसभाबाट शेयर सदस्यहरुलाई उत्साही बनाएर पठाउन अनुरोध गर्नुभयो । साधारणसभाबाट शेयर सदस्यहरु सकारात्मक र उत्साही बनाएर पठाउनुपर्दछ । देशमा ७३ लाख शेयर सदस्य छन् भनिएको छ । त्यसमा दोहोरिएको तेहेरिएकोसमेतलाई हेर्दा ५० लाख हुनसक्छन् । यसको ५१ प्रतिशतलाई सकारात्मक बनाएर पठाउन सकियो भने अहिलेको सहकारी प्रतिको नकारात्मक धारणालाई चिर्न सकिने जिसीले बताउनुभयो । त्यसैले सहकारीहरुले शेयर सदस्यहरुलाई स्पष्ट पार्न आवश्यक रहेको उहाँको भनाई छ ।
उपकार साकोसले वालिङ नगरपालिका ८ र १३ को बायँटारी, चापाकोटको दामाचौर तथा कालीगण्डकी गाउँपालिकाको मिर्मी गरी ४ स्थानमा सेवाकेन्द्र सञ्चालन गरेर वित्तीय सेवा दिदै आएको छ । यसैगरी वालिङकै ७ नम्वर वडाको केवँरेमा सदस्य सम्पर्क कार्यालय सञ्चालनमा रहेको छ । यी सबै स्थानमा इकाई साधारणसभा सम्पन्न गरेको उपकारले भोलि शनिबार मुख्य कार्यालय वालिङमा प्रतिनिधि साधारणसभा गर्ने संस्थाका अध्यक्ष यमकान्त खनालले जानकारी गराउनुभयो । साधारसभाको अवसरमा संस्थामा नियमित बाल बचतकर्ताहरुलाई पुरस्कार वितरण गरिएको थियो । उपकार सहकारीमा ८ हजार १ सय ५४ जना शेयर सदस्य रहेका छन् ।