वालिङ,११ मङ्सिर- वालिङमा राष्ट्रपति रनिङ शिल्ड प्रतियोगिता हुने भएको छ ।सोमबार बसेको वालिङ नगरपालिका शिक्षा समितिको बैठकले प्रतियोगिता आयोजना गर्ने निणर्य गरेको हो ।
प्रतियोगितामा वालिङ नगरपालिका भित्र रहेका सामुदायिक र संस्थागत विद्यालयहरुका १८ वर्ष उमेरका विद्यार्थीहरुले भाग लिन पाउनेछन् । विद्यालय तहका विद्यार्थीहरुमा खेलकुद प्रति अभिरुची जगाउदै खेलका माध्यमबाट भातृत्वको विकास गर्ने उद्देश्यका साथ प्रतियोगितको आयोजना गरिएको नगरपालिकाले जनाएको छ ।
प्रतियोगितामा भलिबल, मार्शल आर्टस्, एथ्लेटिक्स,कबड्डी र फुटबल लगायतका खेलहरु समावेश गरिने नगरपालिकाले जनाएको छ ।
पुष ४ गतेबाट सुरु हुने प्रतियोगिता वालिङ १० मा रहेको औद्योगिक ग्राममा सञ्चालन हुनेछ ।
बैठकले खेलकुद प्रतियोगितालाई व्यवस्थापन गर्न विधागत तर्फ जिम्मेवारी तोकेको छ । भलिबलतर्फ चित्रजंग गुरुङ,मार्शल आर्टस्तर्फ मनोज बुढाथोकी,एथ्लेटिक्सतर्फ दिपेन्द्र खाँण,कबड्डीतर्फ चतुर्भुज गैह्रे र फुटबलतर्फ लाल बहादुर ज्वारचनलाई जिम्मेवारी तोकेको छ ।