वालिङ,१८ साउन- गण्डकी प्रदेशसभा सदस्य कल्पना तिवारीले गण्डकी प्रदेशले अब उत्पादन साथमा अनुदान हातमा भन्ने नारालाई कार्यान्वयनमा ल्याउने बताउनुभएको छ । वास्तविक कृषकले अनुदान पाउनको लागिी प्रदेशले यस्तो नीति लिएर अगाडि बढेको भन्दै झोलामा फर्म लिएर हिड्ने नक्कली कृषकलाई सरकारले प्राथामिकता नदिने बताउनुभएको हो ।
बुधबार वालिङमा एमजी नर्सरी फर्मको उद्घाटन गर्दै प्रदेशसभा सदस्य तिवारीले यस्तो बताउनुभएको हो । पेशा व्यवसायमा धैर्यता आवश्यक रहने भन्दै स्थापना भन्दा निरन्तरता पहिलो प्राथामिकता रहेको उहाँले बताउनुभयो ।
वालिङमै ठुलो नर्सरीको स्थापना गरीनु यहाँका नागरिकको लागिी खुसीको कुरा भएकाले फलफुलका विरुवा, फुलका माला दुबोको मालालगायत यहाँका स्थानीयको आवश्यकताको आधारमा आफ्नो व्यवसायलाई अगाडि बढाउन नर्सरी संचालकलाई उहाँको सुझाव थियो । फुलको मालालगायत फुलजन्य वस्तुमा यहाँको पैसा धेरै विदेशीने अवस्था रहेको भन्दै नेपालको पुँजी नेपालमै राख्न सकियो भने देशको अर्थतन्त्र बलियो बन्ने तिवारीको भनाई छ ।
वालिङ ८ केदारनाथ मार्ग स्थित ४.२ आनामा रहेको नर्सरी फर्मले छिट्टै फुलखेती गरी जिल्लामा वर्षभरिनै फुल तथा फुलको माला पुर्‍याउने नर्सरी संचालक गौरी अधिकारी न्यौपानेले बताउनुभयो । गौरी सहित, सुशिला भट्टराई, मोहनीलाल रिजाल गरी तीज जनाले सामुहिक रुपमा नर्सरीको शुरुवात गर्नुभएको हो ।