मणि प्रसाद अर्याल
वालिङ,१६जेठ- गह्रौ प्राथमिक अस्पताल वालिङमा मंगलबारदेखि अत्यावश्यक प्रसुती शल्यक्रिया सेवाको सुरुभएको छ ।
आज पहिलो पटक ३२ वर्षीया महिलाले दिउसो ३ बजे शल्यक्रिया मार्फत बच्चालाई जन्म दिएको अस्पतालले जनाएको छ ।

वालिङ नगरपालिका ६ निवासी महिलाले शल्यक्रिया मार्फत बच्चालाई जन्म दिएको गह्रौ प्राथमिक अस्पतालका प्रमुख डाक्टर सुरज ढकाले जानकारी दिनुभएको थियो ।
डाक्टर ढकालले अस्पतालमा शल्यक्रिया मार्फत प्रसुती सेवा सञ्चालनमा आएसँगै धेरै महिलाहरुलाई सहजन हुने र प्रसुतीको लागि अन्य अस्पतालमा जानुपर्ने बाध्यताको अन्त्य भएको बताउनुभयो । अस्पतालबाट प्रदान गरिने सेवाहरुलाई थप सुविधायुक्त बनाउँदै लगिने योजना रहेको समेत उहाँले बताउनुभयो ।

विशेषज्ञ चिकित्सक डा. नारायण बहादुर गोदार र डा. सुरज ढकालको संयुक्त स्वास्थ्यकर्मीको टोलिले शल्यक्रिया गरेको थियो ।

वालिङ नगरपालिकाका नगरप्रमुख कृष्ण खाँणले पदभार ग्रहण गर्दै वालिङ नगरपालिकामा महिलाहरुलाई प्रसुती सम्बन्धि शल्यक्रियाको लागि जिल्ला बाहिर पाल्पा, पोखरा लगायतका अस्पतालमा जानुपर्ने बाध्यता रहेको र आफ्नो कार्यकालमा वालिङमा रहेको गह्रौ प्राथमिक अस्पतालबाट सेवा दिने उद्घोष गर्नुभएको थियो ।

नगरप्रमुख खाँणले पहिलोपटक गह्रौ प्राथमिक अस्पतालबाट प्रसुती सम्बन्धि शल्यक्रिया सेवा सञ्चालनमा आएसँगै आफुले सुरुमा गरेको प्रतिबद्धता, योजना र आफ्नो एउटा सपना पुरा भएको भन्दै खुसी व्याक्त गर्नुभयो ।
सवै मिलेर काम गरेको अवस्थामा असहज काम पनि सहज रुपमा गर्न सकिने नगर प्रमुख खाँणको भनाइ थियो । मंगलबारदेखि अन्य थप अत्यावश्यक शल्यक्रिया हाइड्रोसिल, हर्निया र एपेन्डिक्सको पनि सेवा प्रवाह भएको गह्रौ प्राथमिक अस्पतालले जनाएको छ ।