वालिङ,२८ माघ– वालिङ नगरपालिका नगरप्रमुख कृष्ण खाँणले कृषकको साथमा नगरपालिका रहेको बताउनुभएको छ ।
नगरप्रमुख खाँणले कृषकको साथमा नगरपालिका रहेकोले ढुक्क भएर कृषि कर्ममा लाग्न आग्रह गर्नुभयो । कृषि प्रधान मुलुकमा कृषिको विकासले नै देशमा समृद्धि ल्याउन सकिने भएकाले कृषकले उत्पादन गरेका वस्तुको बजारीकरणाका लागि नगरपालिकाले सहकार्य गर्ने नगरप्रमुख खाँणको भनाइ थियो ।
शुक्रबारदेखि वालिङ ६ मा एकिकृत सत्रुजिव व्यवस्थापन आईपिएम कृषक पाठशालाको उद्दघाटन गर्दै नगरप्रमुख खाँणले यस्तो बताउनुभएको हो । प्रदेश सरकार कृषि, उर्जा तथा जलस्रोत मन्त्रालय कृषि विकास निर्देशनालय, कृषि ज्ञान केन्द्रको आर्थिक सहयोगमा आयोजित आईपिएम कृषक पाठशालामा कृषकले बिजारोपण देखि फलाउने सम्मका कार्यमा तालिम दिइनेछन् ।
आईपिएम कृषक पाठशालामा सहभागि बनौँ, बाली व्यवस्थापन दक्षता हासिल गरौँ भन्ने नाराका साथ आयोजित कार्यक्रममा नगरप्रमुख खाँणले भन्नुभयो, ‘वास्तविक कृषकहरुको साथमा हामी छौँ । व्यवसायिक रुपमा कृषि कर्ममा लाग्नुछ । आवश्यक प्राविधिक तथा बजारीकरणको लागि हामी सहयोग गछौँ ।’
तालिममा लिएका सिपहरुको उपयोग गरी व्यवसायिकतामा लागेका कृषकलाई नगरले आवश्यक सहयोग गर्ने उहाँको भनाइ थियो । विभिन्न निकाय तथा संघसंस्थाहरुबाट तालिम लिएपछि सके व्यवसायिक नसके घ¥यासी प्रयोजनकै लागी भएपनि उत्पादनमा लाग्न आग्रह गर्दै नगरप्रमुख खाँणले सिपलाई मर्न दिन नहुँने बताउनुभयो ।
कार्यक्रममा वडा अध्यक्ष श्यामकृष्ण श्रेष्ठले तालिमको भरपुर उपयोग गरी सिप सिक्न सहभागिलाई आग्रह गर्नुभयो । ६० जना कृषकहरुको सहभागिता रहेको तालिममा सैद्धान्तिक तथा प्रयोगात्मक प्रशिक्षकका रुपमा लालप्रसाद पंगेनी रहनुभएको छ ।