वालिङ, ३ माघ–स्याङ्जाको वालिङमा मातृभूमि सेवा समाज नेपालले दोस्रो वार्षिक साधारणसभा तथा प्रथम अधिवेशन सम्पन्न गरेको छ । अधिवेशनले पण्डित नेत्रप्रसाद पराजुलीलाई समाजको अध्यक्षमा सर्वसम्मत चयन गरेको छ । अध्यक्षसहित १३ सदस्यीय कार्यसमिति सर्वसम्मत चयन भएका छन् ।
कार्यक्रममा वालिङ नगरपालिकाका पूर्व नगरप्रमुख दिलिपप्रताप खाँणले आध्यात्मिक र निश्वार्थभावले गठित समाजले दुईवर्ष तदर्थ समितिको समयमा पनि सामाजिक क्षेत्रमा सक्रीय भूमिक देखाएको बताउनुभयो । स्याङ्जा जिल्लाकै ऐतिहासिक, धार्मिक र सांस्कृतिक महत्व राख्ने गह्रौंसुरको काखमा रहेको गौशालाको थप व्यवस्थापनका लागि समाजले गतवर्ष महायज्ञ सञ्चालन गरेर गौमाताको सेवामा सराहनीय कार्य गरेको खाँणले उल्लेख गर्नुभयो । काफलडाँडामा रहेको धुनी शिवालयको पनि गह्रौंसुरको जस्तै ऐतिहासिक र धार्मिक तथा प्राचिन महत्व जोडिएको छ । धुनि शिवालयसँगै गौशाला रहेको छ । यी दुवैको संरक्षण गर्नु हामी सबैको दायित्व हो । आगामी दिनमा के के गर्दा यसलाई व्यवस्थित गर्न सकिन्छ भनेर हामी सबै लाग्नुपर्ने खाँणको भनाई थियो ।

कार्यक्रममा अध्यक्ष पराजुलीले दुईवर्षे तदर्थ समितिकै अवस्थामा रहेको समाजले गौशालाको थप व्यवस्थापनका लागि महायज्ञ सञ्चालनलगायत विभिन्न सामाजिक कार्यक्रममा गतिविधी गरिएको जानकारी गराउनुभएको थियो ।
तीनवर्षे कार्यकालका लागि अधिवेशनले समाजको नयाँ कार्य समिति चयन गरेको अध्यक्ष पराजुलीले बताउनुभयो ।