गोपाल जिटी
वालिङ,२२ असोज–साहित्यकार देवीप्रसाद वनवासीलाई अभिनन्दन गरिएको छ ।
साहित्यका क्षेत्रमा महत्वपूर्ण योगदान पु¥याएकोमा भेषजराज साहित्य प्रतिष्ठान, वालिङ, स्याङ्जाले साहित्यकार देवीप्रसाद वनवासीलाई उहाँकै निवास वालिङ २ शङ्खरेडाँडा पुगी मङ्गलबार अभिनन्दन गरेको हो । मङ्गलबार साहित्यकार वनवासीको सहस्र चन्द्र दर्शन (८४ पूजा )को दिनका अवसरमा उहाँकै घरमा पुगी अभिनन्दन गरेको प्रतिष्ठानले जानकारी दिएको छ ।
वि. सं. १९९७ कार्तिक २७ गते स्याङ्जा जिल्लाको वालिङ नगरपालिका वडा नं. २ शङ्खरेडाँडामा जन्मनुभएका वनवासीले माछापुच्छ्रेको काख (२०२०) कवितासङ्ग्रहबाट औपचारिक साहित्यिक यात्रा प्रारम्भ गर्नुभएको थियो । उहाँका ६ दर्जन भन्दा धेरै सायित्यिक सिर्जनाहरु प्रकाशित छन् । वनवासीका आमाको सन्देश, शहीदको आत्मकथा, विस्कुन जस्ता कवितासङ्ग्रहहरू प्रकाशित छन् । यसैगरी कथा कथौरी, केही रमाइला कथा, छुनुमुनुलगायतका कथासङ्ग्रहहरू, असल मान्छे, अब्बल मान्छे जस्ता उत्कृष्ट बालजीवनीहरू, मुलुकभित्रै भौँतारिँदा , आकृति र अनुभुतिहरूजस्ता लेख–निबन्ध सङ्ग्रहअरू र आँधीखोले लोकसंस्कृति(२०५५) लगायतका पठनीय सिर्जनाहरु हुन् । यसकासाथै उहाँले सम्पादन, अनुवाद र समीक्षाका क्षेत्रमा पनि कलम चलाउनु भएको छ ।
६ दशकभन्दा लामो समय भाषा– साहित्यको सेवामा समर्पित गर्नुभएका वनवासीले ४ दर्जनभन्दा बढी पुरस्कार एवम् सम्मान प्राप्त गरिसक्नुभएको छ ।
उहाँलाई भेषजराज साहित्य प्रतिष्ठानले २०७४ सालमा भेषजराज साहित्य सम्मानद्वारा पनि सम्मानित गरेको थियो ।